Presidenti dekoron 35 familje që shpëtuan hebrenjtë në Shqipëri gjatë Luftës së Dytë Botërore
Presidenti, Bujar Nishani, dekoroi sot disa familje shqiptare që strehuan hebrenjtë gjatë luftës së Dytë Botërore. Në fjalën e tij në ceremoninë e organizuar me këtë rast, Nishani kërkoi që kjo ditë të marrë vendin e merituar në histori.
“Sot me rastin e Ditës Botërore të Kujtesës së Holokaustit jemi mbledhur së bashku për të kujtuar nderuar dhe vlerësuar në emër të shtetit modern ata shqiptarë të cilët vunë veten dhe familjet e tyre në rrezik vetëm e vetëm për të shpëtuar qoftë dhe një jetë të vetme njerëzore. Si do të kishte qenë bota sot sikur të gjithë do të kishin vepruar ashtu sikur shumica e shqiptarëve?!”, tha Nishani.
Në të njëjtën kohë, edhe ministria e Jashtme në bashkëpunim me Këshillin e Evropës dhe Bashkinë e Tiranës, organizuan disa aktivitete me rastin e Ditës Ndërkombëtare të Përkujtimit të Holokaustit.
Për të nderuar të gjithë ata qytetarë shqiptarë që rrezikuan jetën e tyre në shpëtimin e hebrenjve, u përuruan lulishtja “Të Drejtët midis Kombeve”. 75 familje shqiptare janë renditur mes “Të drejtëve midis Kombeve” në Qendrën Ndërkombëtare të Përkujtimit të Holokaustit.
Ministri Bushati dhe Ambasadori i Izraelit në Tiranë, gjatë inaugurimit të parkut, vunë në dukje gjestin fisnik të shqiptarëve në shpëtimin e hebrenjve gjate ditëve të errëta të Luftës së II-të Botërore.
