Qytetarët në Tiranë nga qershori deri në gusht nuk do të kenë mundësi të përdorin abonenë e përgjithshme prej 1600 lekësh për të udhëtuar me linjat urbane në kryeqytet.
Të hënën Këshilli Bashkiak pritet të miratojë heqjen e saj.
Kjo pasi nga 1 qershori bashkia do të riorganizojë itineraret, frekuencat e lëvizjes dhe kushtet e shërbimit të transportit publik, por për këtë duhet të studiohen paraprakisht volumet e udhëtimit.
Operatorët thonë sipas projektvendimit se ato janë në nivele minimale pasi pandemia e ka vënë në vështirësi transportin publik.
Për të dalë në konkluzione të sakta, sipas relacionit, do të duhet heqja e abonesë së përgjithshme.
Kështu që për tre muajt në vijim për të lëvizur në Tiranë qytetarët duhet të paguajnë biletën e cila vetëm për një udhëtim kushton 40 lekë.
Ata që përdorin autobusët urbanë vetëm për të shkuar dhe për tu kthyer nga puna duhet te paguajnë 80 lekë në ditë.
