Situata në spitalin e Krujës vijon të jetë alarmante nga pacientët të cilët janë paraqitur me helmim nga uji. Mësohet se mbrëmjen e djeshme ka pasur të tjerë qytetarë që janë paraqitur në spital me gjendje të keqe për shkak të ujit, duke kërkuar nga mjekët ndihmë mjekësore.
Ditën e djeshme, u raportua në media se 170 qytetarë, burra, gra e fëmijë përfunduan në spital me shenja helmimi. Për dy ditë me radhë, qytetarët kanë pasur të njëjtat simptoma, si diarre, të vjella, dhimbje barku dhe temperaturë. Ata kanë marrë ndihmën e nevojshme mjekësore dhe më pas janë larguar për në banesat e tyre, por ende ka qytetarë që ndodhen ende në spital, pasi janë në një gjendje më të rënduar shëndetësore.
Drejtoresha e spitalit Yllka Shetaj, bëri të ditur ditën e djeshme se kjo situatë nuk ka lidhje me një helmim masiv.
“Ka raste të shtuara të pacientëve që kanë kërkuar ndihmë për shkak të helmimit. Kanë marrë mjekim në urgjencë dhe janë larguar. Nuk dimë nëse helmimi vjen nga uji apo ushqimi, kemi kërkuar të bëhen analiza nga NJVKSH. Nuk mund të them se kemi të bëjmë me helmim masiv,”– u shpreh ajo.
Janë marrë disa mostra të ujit të rrjetit të cilat janë dërguar për ekzaminim, por përgjigjia nuk ka dalë ende. Policia doli me një njoftim zyrtar për ngjarjen e rëndë ditën e djeshme por raportoi se bëhej fjalë vetëm për 35 të helmuar. Pritet që në orët në vijim të ketë informacione të reja për situatën e rëndë.
