Në qytetin bregdetar të Vlorës po zhvillohet një tryezë e përbashkët mes dhomës së avokatisë së qytetit, KLGJ-së, Ministrisë së Drejtësisë, si dhe përfaqësuesve nga Gjykata dhe Prokuroria, ku është diskutuar në lidhje me hartën e re gjyqësore.
Një reagim të fortë ka pasur edhe avokati Maks Haxhia, ku shprehu qartë qëndrimin kundër hartës së re gjyqësore dhe tha se në Apel ka çështje të vitit ende 2015 pa zgjidhur.
“Reforma në drejtësi ishte e pastudiuar, dështoi. Nuk mund të bëhet reformë tjetër (hartë gjyqësore) për të zgjidhur kolapsin e të parës. Gjykata e Apelit ishte dështim, korrupsioni ka nisur në atë gjykatë. Apeli ka ende çështje të 2015 pa zgjidhur. Shqipëria nuk është Tirana, nuk mund të ketë gjykatë vetëm në Tiranë. Po masakroni drejtësinë. Mos gënjeni, duhen të paktën 4 gjykata apeli, 4 gjykata administrative, se e dini çfarë do të ndodhë, Kuvendi mbulon çështjet e qytetarëve. Një gjyqtar duhet të ketë 10 këshilltar, adoptojini në sistem, ju si qeverisje e gjyqësorit duhet të ndërhyni për të ecur drejtësia. Juve po nxirrni problematikën e Vettingut, ata e shohin dhe në aspektin personal, duan që ta zgjasin, sepse marrin lekët e veta. Po vendosin njerëz që as vetë nuk e kanë kaluar Vettingun,” tha ai.
Nëse propozimi i Këshillit të Lartë Gjyqësor do të marrë miratimin në Këshillin e Ministrave, sistemi i Drejtësisë do të ketë 12 gjykata të juridiksionit të përgjithshëm dhe 1 gjykatë Apeli në Tiranë ku 10 gjykata do të shkrihen.
