Familjet rome presin të rregullojnë strehën para zgjedhjeve, por kryetari bashkisë Kuçovë, Kreshnik Hajdari, bën pazare me tenderin. Sapo u harrua skandali ku ai u përfshi për “falsifikim dokumentesh”, kryetari ka vazhduar me vrullin parazgjedhor të tenderave me abuzime.
Më 9 gusht 2024, Bashkia Kuçovë ka hapur “garën” e tenderit me objekt ‘Përmirësimi i banesave ekzistuese për komunitetet e varfra dhe të pafavorizuara’. Bëhet fjalë për rikonstruksionin e 16 banesave, të cilat janë ndërtuar para viteve ‘90, por gjithsesi sipas projektit, do t’u bëhen suvatime të reja, izolim të çative, lyerje dhe vendosje e dritaresh dhe dyer të reja.
Gjithsesi për të gjitha banesat thuhet që kanë nevojë për ndërhyrje pasi janë punime të vjetra, por nuk specifikohet, kështu që mbetet më shumë në dorë kompanisë fituese që t’i evidentojë rast pas rasti.
Tenderi
Komisioni i Hajdarit me llogaritë e tij ka dalë në përfundimin se duhen shpenzuar 270 milionë lekë. Deri më datë 26 gusht 2024 u dorëzuan 5 oferta. “Aida Construction” shpk kishte ofertën më të ulët me vlerë 214 milionë lekë, ndërsa “Z D R A V A” shpk kishte ofertën më të shtrenjtë me vlerë 267 milionë lekë. Shihet një diferencë me vlerë 53 milionë lekë mes tyre dhe në këto raste ligji kërkon që të merret në konsideratë oferta më ekonomike, kështu mund të kursehej fondi limit.
Por, Hajdari ka bërë të kundërtën, ofertën më të lirë e ka skualifikuar në fazën e parë, menjëherë pas saj edhe 3 ofertat e tjera më të lira dhe la për në fazën finale vetëm firmën “Z D R A V A” shpk, me propozimin më të shtrenjtë.
Më datë 14 tetor 2024 është bërë publike kontratat e skuqur me shkelje për mungesë konkurrence dhe shpalljen fituese të ofertës më të shtrenjtë. Open Data Albania i ka vendosur tenderit “Flamurin e Kuq”, që është shenja e riskut të korrupsionit. Të paktën 53 milionë lekë mund të shpëtoheshin, nëse nuk do të kishte abuzim në këtë prokurim.
Marrëveshje me firmën që mashtron me punimet
Ndërkohë na lind një pyetje, se si mund të përfshihet sërish në tendera një firmë e spikatur për mashtrime. Firma e shpallur fituese me ndërhyrjen e KPP, “Zdrava” shpk ka 5 bashkëpronarë dhe drejtohet aktualisht nga Dashnor Sinanaj. “Zdrava” është favorizuar vazhdimisht nga zyrtarët e tenderëve dhe është skeduar për moskryerjen e punimeve sipas kontratave. Kujtojmë se në vitin 2022, Kontrolli i Lartë i Shtetit ka zbuluar mashtrimin me volumin e punimeve kjo firmë. Bëhet fjalë për tenderin me “Flamur të kuq” për rikonstruksionin e rrugës së fshatit Çekin dhe zëvendësimin e tubacionit kryesor të Ujësjellësit Çekin në Gramsh’.
Kontrata me vlerë rreth 1 milionë USD është lidhur nga kryetari i Bashkisë së Gramshit në vitit 2020, Klodian Taçe.
Kontrolli i Lartë i Shtetit ka konstatuar abuzime në zbatimin e kësaj kontrate, ku Bashkia Gramsh ka likuiduar punime të pakryera.
Nga ana tjetër edhe vetë Hajdari është i zhytur në skandale. Kujtojmë se në janar të këtij viti Gjykata e Posaçme kundër Korrupsionit dhe Krimit të Organizuar dënoi me 9 muaj burg kryebashkiakun e Kuçovës, Kreshnik Hajdari, për falsifikim të vulave dhe formularëve më shumë se një herë, për shkak të mos deklarimit të një procesi gjyqësor ndaj tij në Greqi.
Ai kërkoi gjykim të shkurtuar në janar dhe procesi u zhvillua bazuar në atë rregull, nga i cili përfitoi uljen e një të tretës së dënimit, deri në 6 muaj burgim, një dënim, i konvertuar në 150 orë punë publike, ose afro 18 ditë pune.
Nuk e dimë nëse i ka kryer këto ditë pune Hajdari, por mund të themi që dënimi i dhënë nuk i bëri efekt fare!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/201
