Qeveria do të harxhojë 10 miliardë lekë për bojatisjen e Spitalit Ushtarak. Këto lekë po administrohen nga Ministri i Ekonomisë, Kulturës dhe Inovacionit, Bledi Gonxhe, i cili ka kohë që marrë duart e tij pjesën e kuanit të fondeve të shëndetësisë. Duke përdorur Operatorin e Blerjeve të Përqendruara, ministri Gonxhe ka firmosur shpenzimin e 10 miliardë lekëve. Këto para do të shkojnë për të rregulluar fasadën e spitalit Ushtarak, përmes prokurimit me objekt “Rikonstruksion i Godinës së Korpusit Qendror dhe Sistemimi i Ambienteve të Jashtme të Spitalit Universitar të Traumës”.
Sipas të dhënave do të bëhet çmontimi dh riparimi i kamerave dhe kondicionimit nëse kanë nevojë, si dhe e gjithë fasada e jashtme e godinës.
“Objekt i detyrës se projektimit është rikonstruksioni total i të gjithë elementeve të objektit, duke nisur nga rikonstruksioni dhe rifiniturat e godinave, duke përfshirë rehabilitimin e sistemit konstruktiv (nëse paraqitet problematike), çmontimit dhe largimit të të gjithë instalimeve të sistemeve të ndryshme (elektrik, të kondicionimit, aspirimit, të kamerave, brenda hapësirës së Korpusit Qendror të Spitalit Universitar të Traumës.
Sipas planit te rikonstruksionit te godinës, me financim nga buxheti i shtetit, është parashikuar një rikonstruksion i ambienteve duke e kthyer ne ambiente te përshtatshme me një funksionim normal dhe dinjitoz dhe me standardet me te mira ndërkombëtare për këto tipe godinash te Spitalit Universitar te Traumës”, thuhet në dokument.
Është vërtetë se gjendja e spitalit është “jo dinjitoze”, por jo për shkak të pamjes së jashtme. Në këtë pikë ne sigurisht sugjerojmë që me kaq shumë para se do të derdhen, të bëhet ndërhyje edhe në ambientet e brendshme, pasi shumë dhoma dhe tualete janë në gjendje skandaloze.
Tenderi me shkelje
Shohim se Open Data Albania i ka vendosur tenderit “Flamur të kuq” (shenja e riskut të korrupsionit) për mungesë konkurrence dhe përzgjedhjen e ofertës më të shtrenjtë. Edhe pse kanë shfaqur interes 12 kompani me oferta të ndryshme, procedura është mbyllur në mënyrë abuzive
Tre prej kompanive kanë hapur rrugë duke dorëzuar dokumentet me vlerë zero lekë, kështu mbetën 9 kompani, që pritej të garonin mes njëra-tjetrës. Por, Gonxhe i ka skualifikuar automatikisht, përfshirë këtu edhe firmën që kishte me ofertën më të ulët.
Kompania fituese “ALBA KONSTRUKSION” sh.p.k, në pronësi të Xhavit Ismailit, ishte e paracaktuar që të merrte tenderin. Biznesmeni Ismaili është bërë shpesh protagonist i tenderave të tillë dhe sërish nuk e nxjerr njëri nga loja.
Përkundrazi gjithmonë e më shumë i jepet hapësirë në procedurat tenderuese me vlera të mëdha. Kjo firmë është zotëruese e katër koncesioneve;
- Koncesioni me objekt “Ndërtimi, operimi dhe mirëmbajtja e hidrocentralit Kryezi dhe Kryezi i Epërm”, përmes kompanisë bijë BEKIM ENERGJITIK
- Koncesioni me objekt “Ndërtim, operim, transferim e Hidrocentraleve Backa 1, Backa 2, Backa A, Backa B, Backa C”, përmes kompanisë KROI MBRET ENERGJI
- Koncesioni me objekt “Ndërtim, operim dhe transferim i Hidrocentraleve Prishta 1, Prishta 2”, kompania bijë HP “Prishta 1 & 2 ENERGY”
- Koncesioni me objekt “Për përmirësimin e infrastrukturës Arsimore në Bashkinë e Tiranës për katër objektet arsimore në zonën Tirana 4”, Shoqërie Koncesionare Tirana 4.
Pra, kompania e Ismailit i ka shtrirë “tentakulat” gjithë andej dhe nuk është surprizë që Gonxhe e veçoi për t’i dhënë këtë tender.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
