Policia e Fierit ka arrestuar një vlonjat dhe dy fierakë pasi po transportonin një sasi prej 43 kilogramësh lëndë narkotike.
Gjatë operacionit antidrogë të koduar “Zhupani”, në pranga kanë rënë shtetasit A. M., 40 vjeç, M. K., 46 vjeç dhe K. Sh., 40 vjeç.
Këta të fundit mesa duket kanë rënë në kurthin e të infiltruarve, të cilët duken në video të veshur me xhupa e kapele, teksa asistohen nga policia.
https://streamable.com/3u78x
Finalizohet me sukses operacioni antidrogë i koduar “Zhupani”.
Goditet një grup, i cili prodhonte dhe shpërndante lëndë narkotike.
Arrestohen në flagrancë 3 shtetas, sekuestrohen 43.5 kg lëndë narkotike kanabis në formë çokollate.
Pas një hetimi njëmujor me përdorimin e metodave speciale të hetimit, nga Seksioni për Hetimin e Narkotikëve në Drejtorinë Vendore të Policisë Fier, në bashkëpunim me Task-Forcën e Prokurorisë së Rrethit Gjyqësor Fier, Forcën e Posaçme Operacionale në Drejtorinë e Përgjithshme të Policisë së Shtetit dhe DVP Vlorë u finalizua operacioni antidrogë i koduar “Zhupani”.
Operacioni filloi që në orët e para të mëngjesit të sotëm në lagjen “1 Maj”, në Fier dhe u finalizua në qytetin e Vlorës.
Në përfundim të këtij operacioni, u bë arrestimi në flagracë i shtetasve:
A.M., 40 vjeç, banues në Fier.
M.K., 46 vjeç, banues në Fier
K.Sh., 40 vjeç, banues në Vlorë.
Këta shtetas, në bashkëpunim me njëri-tjetrin, prodhonin dhe shisnin lëndë narkotike në Qarkun e Fierit dhe Vlorës.
Gjatë operacionit u sekuestruan 43.5 kg lëndë narkotike e dyshuar kanabis në formë çokollate.
Materialet do i kalojnë Prokurorisë pranë Gjykatës së Shkallës së Parë Fier, për veprime të mëtejshme procedurale.
