Teksa ditën e sotme pritet të të mbahet seanca gjyqësore për ish-ministrin Saimir Tahiri, nuk dihet nëse do të zhvillohet gjyqi. Raportohet se seanca gjyqësore pritet të të nisë në orën 10:00.
Por duke marrë shkas nga dorëheqja dje e Daniela Shirkës, gjyqtare e çështjes Tahiri, duket se mund të ketë një shtyrje të kësaj seance. Shirka është e treta gjyqtare qe tërhiqet nga çështja penale ndaj Tahirit dhe ish-drejtorit të Policisë së Vlorës, Jaeld Çelës, me argumentin se është në papajtueshmëri përderisa ka shqyrtuar një çështje të bashkëlidhur e atë të ish-ministrit.
Çështja në fjalë do të gjykohet nga gjykatës të marrë hua nga Apelet e tjera. Në vend të saj është deleguar gjyqtari Florian Kalaja, nga Apeli i Durrësit. Më herët duhet theksuar se janë larguar me dorëheqje nga kjo çështje, gjyqtarët Miliana Muça dhe Ilirjana Olldashi. Sipas Lalës, me shumë gjasa seanca gjyqësore edhe mund të shtyhet, pasi gjyqtari Kalaja do të kërkojë kohë për t’u njohur me dosjen voluminoze, e cika ka vite që kalon nga njëra shkallë e gjyqësorit te tjetri. Po ashtu Lala theksoi se Tahiri ka mbërritur në Gjykatën e Posaçme të Apelit.
Kujtojmë se ish-ministri Tahiri u vu nën shënjestrën e organeve të drejtësisë në tetor të vitit 2017, pasi autoritetet italiane goditën një grup të strukturuar kriminal në trafikun e marijuanës, që drejtohej nga vëllezërit Habilaj –të afërm të Tahirit.
Prokuroria e akuzoi Tahirin për trafik të narkotikëve dhe kërkoi arrestimin e tij, por shumica parlamentare socialiste e bllokoi kërkesën për arrestim dhe e sulmoi hetimin e prokurorisë si të njëanshëm. Në shtator 2019, Tahiri u shpall i pafajshëm për akuzat e trafikut të narkotikëve dhe grupit të strukturuar kriminal, por u dënua nga Gjykata e Krimeve të Rënda me 5 vjet burg për shpërdorim detyre, dënim i cili u konvertua me 3.4 vjet për shkak të gjykimit të shkurtuar.
Vendimi i shkallës së parë u prish nga Gjykata e Posaçme e Apelit, e cila e riktheu çështjen për rishqyrtim, pasi u konstatuan parregullsi në proces.
