Është shtyrë sërish seanca gjyqësore ndaj Arbër Paplekajt, i akuzuar për vrasjen e Pjerin Xhuvanit, pak ditë para zgjedhjeve të 25 prillit të vitit 2022.
Seanca e radhës do të mbahet më datë 22 dhjetor. Gjykata kërkon më shumë kohë të shqyrtojë kërkesat e avokatëve ndër më kryesorja ndarja e proceseve gjyqësore për të pandehurit. Pra të gjykohen veçmas pasi akuzohen për vepra të ndryshme penale.
Po ashtu do të shqyrtojë edhe kërkesën për gjykim të shkurtuar për të pandehurit e tjerë me përjashtim të Arbër Paplekajt. Për këtë të fundit do të shqyrtojë pavlefshmërinë e disa akteve proceduriale.
Kujtojmë se ngjarja e rëndë ndodhi më 21 prill 2021, 4 ditë para zgjedhjeve parlamentare të 25 prillit, në Elbasan u vra Pjerin Xhuvani, përkrahës i Partisë Socialiste. Paplekaj ishte pjesë e një “SMV”, strukture për Mbrojtjen e Votës e ngritur në Elbasan nga PD. Pas një sherri verbal pasi SMV dyshonte se Xhuvani ishte pjesë e një grupi që blinin vota, ndodhi vrasja ku mbeti i pajetë Xhuvani dhe u plagosën 4 persona të tjerë.
Të plagosurit ishin Paulo Vuksani, Emiljano Prenga, Eltjon Bodinaku dhe Xhensila Sota. Nga dita e arrestimit deri më sot në pranga është ish-oficeri i RENEA-s, Arbër Paplekaj i cili akuzohet se qëlloi për vdekje Xhuvanin dhe dhëndrin e tij, Eltjon Bodinakun. Nuk dihet ende kush qëlloi ndaj Emiljano Prengës dhe Paulo Vuksanit, të dy ish-policë. Paplekaj, një ish efektiv i RENEA u vetëdorëzua dhe pranoi krimin duke thënë se e kishte bërë goditjen pasi ishte qëlluar më parë me armë zjarri.
