Gjykata e Shkodrës ka caktuar këtë të enjte masën e sigurisë “detyrim paraqitje” 8 banorët e arrestuar të Baks-Rrjollit. Gjithashtu, atyre u është ndaluar të shkojnë pranë tokave – praktikisht u ndalohet të protestojnë kundër resortit të Bashkim Ulajt.
Banorët e tjerë që u mblodhën para Komisariatit të Shkodrës e cilësuan vendimin të padrejtë. Ata akuzojnë Fatmir Shpellzën, ish-zyrtar i kadastrës dhe figurë politike lokale, se ka përfituar pronësinë e rreth 150 hektarëve tokë në Velipojë me dokumente false dhe më pas ia ka shitur botuesit Bashkim Ulaj.
Gjatë protestës së 28-shkurtit dhjetëra banorë të fshatit shkodran dhe jo vetëm, thyen xhamat e eskavatorëve dhe kabinave të kompanisë “Gener 2” në pronësi të Ulajt, si dhe dëmtuan makinat e kompanisë private të sigurisë, “Breçani Security”, e cila prej disa ditësh është kontraktuar për ruajten e kantierit. Sipas banorëve botuesi dhe biznesmeni Bashkim Ulaj po u grabit pronat për të ndërtuar një resort të tijin.
Punimet për ndërtimin e “Blu Borgo”-s në një sipërfaqe prej 146 hektarësh, Bashkim Ulaj i nisi në fillim të shkurtit pasi mori lejen e ndërtimit. Projekti parashikon 33 struktura akomoduese dhe shërbimi, me objekte nga 3 deri në 10 kate mbi tokë dhe një kat nëntokë. Subjekti zhvillues është shoqëria “ABA Blue Borgo”, me statusin e investitorit strategjik.
