Presidenti Ilir Meta ka dekretuar emërimin e Sokol Ngresin si gjyqtar në Gjykatën e Lartë. Me emërimin e tij Gjykata e Lartë bëhet me 13 anëtarë, nga 19 që e parashikon Kushtetuta.
Sipas njoftimit zyrtar, pas 5-vitesh në pamundësi për ta ushtruar këtë funksion themelor të saj, nga sot gjykata mundet të unifikojë praktikën gjyqësore për t’u mbledhur dhe për të gjykuar në Kolegjet e Bashkuara.
“Nga sot Gjykata e Lartë gëzon kuorumin e nevojshëm (2/3 e anëtarëve) për t`u mbledhur dhe për të gjykuar në Kolegjet e Bashkuara. Gjykata e Lartë, pas 5-vitesh në pamundësi për ta ushtruar këtë funksion themelor të saj, nga sot mundet të ndryshojë/unifikojë praktikën gjyqësore. Nga sot ajo rikthehet në funksionalitet për të shqyrtuar çështje në Kolegje të Bashkuara dhe për të përmbushur plotësisht misionin dhe autoritetin e saj sublim për çështje që kanë nevojë për kuptimin dhe unifikimin e zbatimit të ligjit, duke i siguruar kështu të gjithë sistemit gjyqësor zhvillimin/ndryshimin e praktikës gjyqësore, unifikimin e jurisprudencës, dhe një qëndrim uniform lidhur me çështje të ndryshme juridike në funksion të interesit publik, në respektim të të drejtave dhe lirive themelore të njeriut në dhënien e drejtësisë”, shkruhet në njoftim.
