Gjykata e Catania-s, ka anuluar urdhër-arrestin për Fatmir Minaj, një prej katër shqiptarëve të arrestuar si pjesë e bandës së Habilajve.
Bëhet me dije se lirimi për Fatmir Minaj është vendosur gjatë ditës së enjte, ndërsa Moisi Habilaj do të mbetet në burg deri në përfundim të hetimeve. Minaj është mbrojtur nga avokati Biago Mauricio Catalano, i cili gjithashtu mbron në këtë çështje edhe Moisiun, kreun e bandës “Habilaj”.
“Trendafili i erës” do të quhej aksioni, i cili do të rezultonte fatal për të dhe 10 shtetas të tjerë, ku do të shkatërrohej një prej bandave më të mëdha të trafikimit të kanabsit dhe sipas autoriteteve italiane vlera e drogës së sekuestruar arrin shifrën e 20 milionë eurove.
Bashkë me Minaj, në prangat e policisë së shtetit fqinj ranë shqiptarët Maridian Sulaj dhe kreu i bandës Moisi Habilaj, po ashtu edhe italianët Antonio Riela, Vincenzo Spampinato, Gianluca Passavanti dhe Angelo Busacca. Policia italiane ka kërkuar edhe ndihmën e kolegëve në Shqipëri, për të zbuluar nëse ka persona të tjerë të implikuar në këtë ngjarje kriminale.
