Pak ditë pasi GJKKO vendosi të zëvendësojë masën e sigurisë nga “arrest shtëpie” në “detyrim me paraqitje” kundrejt garancisë 20 milionë lekë të vjetra, mjeku Edmond Gashi rinis punën në klinikën e tij private. Përmes një postimi në “FB” ai ka deklaruar se tashmë është rikthyer në klinikë.
“Me kënaqësi ju informojmë se Dr. Edmond Gashi është rikthyer në klinikën tonë dhe është gati t’ju mirëpresë me kujdesin dhe përkushtimin që e karakterizon. Pas një periudhe sfiduese, Dr. Gashi është plotësisht i përkushtuar të vazhdojë të ofrojë shërbimin e tij profesional për të gjithë ju. Ju ftojmë të rezervoni takimin tuaj për një përkujdesje shëndetësore të përkushtuar dhe të plotë. Dr. Gashi ju mirëpret“, thuhet në njoftimin e shpërndarë nga klinika private “Megis” në pronësi të Gashit, e cila ishte gjithashtu pjesë e kontrolleve të SPAK, kur u zbardh skandali i mjekëve që merrnin para nga pacientët me kancer duke i orientuar pikërisht te kjo strukturë.
Ndryshimi i masës
Gjykata e Posaçme zbuti masën e sigurisë mjekut Edmond Gashi, nga “Arrest në shtëpi” në “Detyrim paraqitje”. Ndryshimi për masën e sigurisë erdhi pas dhënies së garancisë pasurore prej 20 milionë lekësh nga Gashi, si dhe bllokimi i pasaportës për të mos dalë jashtë vendit. Kjo masë ka ndryshuar të premten, por u njoftua vetëm ditën e djeshme (11 Nëntor).
Prokuroria e Posaçme nuk ishte dakord me kërkesën e mbrojtjes, duke kërkuar vijimin e masës, teksa pas vendimit të GJKKO pritet të ushtrojë ankim në Apelin e Posaçëm.
Gashi akuzohet se pacientët me sëmundje tumoriale të spitalit publik i çonte për t’i operuar në klinikën private të tij “Megis” në Astir, shpesh herë edhe pa qenë e nevojshme.
Mjeku Edmond Gashi ishte i vetmi i cili kishte mbetur në masë arresti në lidhje me skandalin tek Onkologjiku, pasi më 18 shtator, Apeli i Posaçëm zbuti pozitat dhe për farmacistin Florian Marku, i cili do të hetohet në detyrim për t’u paraqitur, duke iu hequr masa e “arrestit në shtëpi”. Po ashtu, vendosi të shuajë masat detyrim paraqitje për babain e mjekut Edmond Gashi, Halil Gashin, administrator i klinikës private “Megis” ku adresoheshin pacientët, si dhe për ish-nëndrejtoreshën e QSUT, Brikena Qirjazi. Nën hetim për këtë dosje janë edhe mjekja Alketa Pere, Emiljano Lela dhe Drilona Kishta, të hetuar në masën “detyrim paraqitje”.
Hetimi për këtë çështje nisi fillimisht nga Prokuroria e Tiranës, ku nga hetimi i kryer ka rezultuar se pacientëve të diagnostikuar me tumor nuk u jepej trajtimi i duhur mjekësor në spitalin shtetëror dhe më pas drejtoheshin në klinika private. Mjekët e spitalit publik i orientonin pacientët për t’i operuar drejt klinikave private, shpesh herë dhe pa qenë e nevojshme për ta, me qëllimin e vetëm për të përfituar prej tyre.
Po ashtu, janë konstatuar raste të blerjes së ilaçeve me vlera të konsiderueshme për kimioterapi, nga farmaci të cilat këto medikamente i tregtonin pa pullën fiskale dhe me kod të prishur, duke krijuar dyshimin në lidhje me autenticitetin e këtyre barnave.
Mjekët veç akuzës së “shpërdorimit të detyrës”, po hetohen dhe për korrupsion, pasi po iu verifikohet pasuria.
Ndërkohë, SPAK është në pritje të përgjigjeve nga një sërë institucionesh lidhur me kërkesat për të dhëna e dokumentacion mbi mjekët si edhe për pasurinë e tyre. Kjo çështje po hetohet nga prokurori Elvin Gjoka.
