Kancelarja Angela Merkel dhe pasardhësi i saj Olaf Scholz ranë dakord se personat e pavaksinuar nuk do të lejohen të marrin shërbime në shumë prej dyqaneve, eventet kulturore e artistike. Bundestagu është duke diskutuar nëse vaksina do të jetë e detyrueshme.
Ndërkohë të paktën 50 persona u infektuan me variantin e ri Omicron, pasi 120 njerëz u mblodhën për një festë në Norvegji.
Një e dhënë kjo që tregon se ky mutacion i ri i Covid do të tejkalojë edhe variantin Delta, i cili aktualisht dominon në Evropë. Shkencëtarët janë ende duke studiuar variantin Omicron duke shpresuar të kuptojnë nëse vaksinat janë efektive edhe ndaj tij.
Shumë qeveri europiane këmbëngulin se e vetmja mënyrë për t’i dhënë fund pandemisë është rritja e niveleve të vaksinimit.
Në Britani të Madhe, kryeministri Boris Johnson shpreson të japë një shembull duke marrë dozën e tretë përforcuese. Por, Johnson shprehet se qeveritë nuk duhet ta teprojnë.
“Gjëja më e rëndësishme është që njerëzit duhet të ndjekin udhëzimet që kemi vendosur dhe nuk duhet t’i anulojnë gjërat, nuk është aspak e nevojshme. Nuk është kjo ajo që po themi. Ajo që po bëjmë është të përpiqemi për t’iu përgjigjur në mënyrë të ekuilibruar dhe proporcionale ardhjes së variantit Omicron”, deklaroi ai.
Nga njëra anë vaksina dhe nga ana tjetër shfaqja e një variant të ri, qeveritë në mbarë Evropën po peshojnë se cilat kufizime duhet të zbatohen përpara Krishtlindjes.
Banorët e Evropës kanë filluar të ndiejnë lodhjen e kufizimeve dhe një bllokim i përgjithshëm duket i vështirë për t’u justifikuar politikisht.
