Ish-deputetja e Partisë Demokratike Rudina Hajdari ka kujtuar të atin në Ditën Kombëtare të Rinisë. Sipas saj, Azem Hajdari në 8 dhjetor të 1990, ia doli të nisë një rrugëtim pa kthim për të përmbysur një nga diktaturat më të egra në botë.
Ndër të tjera, Rudina Hajdari thekson se sa herë ndihet e demoralizuar e gjen forcën te babai dhe ata mijëra studentë të cilët nuk pyetën për kërcënimet, por ngritën kryet për një jetë më të mirë.
Postimi i plotë i Rudina Hajdarit:
Në 8 dhjetor të vitit 1990, lëvizja studentore e udhëhequr nga Azem Hajdari, ia doli të nisë një rrugëtim pa kthim për të përmbysur një nga diktaturat më të egra në botë.
Ata studentë dhe pedagogë me kurajon dhe qëndresën e tyre ia dolën të ndryshojnë historinë e vendit.
Sa herë ndihem e demoralizuar, i rikthehem kësaj pike në historinë e Shqipërisë dhe aty gjej forcë.
Gjej forcë te Azem Hajdari, gjej forcë te ata mijëra studentë të cilët nuk pyetën për kërcënimet, nuk pyetën për dhunën policore, nuk pyetën për terrorin komunist, por ngritën krye për një jetë më të mirë.
Akti i tyre duhet të frymëzojë edhe sot, çdo të re e të ri e të na japë forcë për të luftuar e punuar përditë që e ardhmja jonë të jetë këtu e jo në emigrim.
Akti i tyre duhet të shërbejë si motivim për çdo shqiptar që të kërkojë me forcë një Shqipëri si gjithë Europa, me institucione të forta, demokraci të vërtetë e shtet që punon për mirëqënien e çdo banori.
Gëzuar 8 dhjetorin!
