“ Tirana Equestrian day” – Gara Ndërkombëtare e Kërcimit me Kuaj u zhvillua të dielën për herë të parë në Tiranë, me pjesëmarrjen e 16 kalorësve shqiptarë e të huaj.
Garues nga Bullgaria, Maqedonia, Serbia, Kroacia, Greqia, Austria, Italia, Danimarka dhe Shqipëria performuan në disiplinën “steeple chasing”, ndërkohë që në këtë garë mori pjesë edhe Kampioni Ndërkombëtar, Hilmar Meyer.
Aktiviteti sportiv u zhvillua në parkun para stadiumit “Selman Stërmasi” me mbështetjen e Agjencisë së Parqeve dhe Rekreacionit – Bashkia Tiranë dhe Federatës Shqiptare të Sporteve me Kuaj.
Në përfundim të aktivitetit, fitues u shpall garuesi nga Gjermania, ndërsa për gjithë të pranishmit u ofrua një spektakël i vërtetë sportiv.
Gara Ndërkombëtare ishte e hapur për publikun dhe gjithë të apasionuarit pas hipizmit kishin mundësi ta ndiqnin pa pagese. I cilësuar ndër eventet më të bukura të pranverës në kryeqytet, aktiviteti ishte i pasur me muzikë, lojëra argëtuese etj.
