Sfida mes Juventusit dhe Interit në Serie A nuk kaloi pa polemika dhe në rastin e episodit Bastoni-Kalulu me këtë të fundit që u ndëshkua me karton të kuq pas akumulimit të dy kartonave tëverdhë, ndërhyri edhe shefi i arbitrave në Itali, Gianluca Rocchi.
‘Na vjen shumë keq për episodin; për vendimin e La Penna që është e qartë që është e gabuar dhe për faktin që nuk u mundësua përdorimi i VAR për ta rregulluar-tha Rocchi për ANSA që zgjeroi më tej temën e diskutimit teksa foli edhe për simulimet.
‘La Penna ndihet shumë keq dhe ne i jemi pranë, por duhet të them të vërtetën, nuk është i vetmi që gaboi-shtoi Rocchi-sepse dje kishte një simulim të qartë. E fundit në një seri të gjatë simulimesh në një kampionat ku kërkojnë në çdo mënyrë të na e hedhin’
Rocchi nuk iu vjen shumë rrotull fjalëve edhe në lidhje me raportet mes arbitrave dhe skuadrave.
‘Trajnerët nuk na kanë ndihmuar kurrë, por na kanë vënë në vështirësi-tha Rocchi-na vjen shumë keq sepse në fund të gjithë shfryjnë ndaj nesh. Jemi të aftë të marrim përsipër përgjegjësitë tona kur bëjmë gabime, askush nuk na mbron. Po ju them edhe këtë, një gjë për të cilën më vjen keq është që ne jemi të vetmit që pranojmë se kemi gabuar. Kemi një transmetim ku cdo javë shfaqim gabimet tona, ua tregojmë të gjithëve. Sot nuk dëgjoj njerëz që të thonë: ‘edhe ne kemi gabuar’ . Më mjafton që të bëjnë 10% të herëve që e bëjmë ne këtë gjë dhe kjo sinqerisht është turpëruese. Duam të themi që gjithnjë është faji i arbitrit të Rocchi? Shumë mirë. Por unë besoj se dikush duhet të shohë brenda ndërgjegjes së vet. Për të qenë i qartë, i referohem atyre që hyjnë në fushë dhe sillen në një farë mënyre’.
gijotina.com/
