Dhjetëra udhëheqës botërorë janë mbledhur në Izrael për t’i bërë homazhet Shimon Peresit, një prej themelueseve të kombit izraelit, i cili u nda nga jeta në moshën 93-vjeçare.
Një ceremoni shtetërore u mbajt në nder të ish-kryeministrit dhe ish-presidentit pranë varrezave kombëtare të Jeruzalemit, ku edhe do të prehet pranë shumë liderëve të tjerë izraelitë. Mes të ftuarve ishin figura të rëndësishme të skenës globale, të tillë si presidenti amerikan Barack Obama, kancelarja Angela Merkel, kreu i Elizesë François Hollande, Sekretari i Përgjithshëm i OKB-së Ban Ki Mun, por gjithashtu edhe lideri i autoritetit palestinez Mahmud Abas, i cili do të vizitojë për herë të parë Izraelin që prej vitit 2010.
