Specialist i policimit në zonën e Ndroqit Adrian Malliku është vënë në hetim pasi akuzohet për “Shpërdorim Detyre”. Ai rezulton se ka qenë në dijeni të laboratorit të drogës, por nuk e ka raportuar atë.
Burime bëjnë me dije se banesa që u kthye në laborator droge në fshatin Pinet në Ndroq të Tiranës rezulton të jetë në pronësi të një personi që banon në Austri, i cili e ka lëshuar me qira. Një banor i zonës ka deklaruar në polici se fundjavave shikonte dy gra më fëmijë në oborrin e kësaj banese.
“Çdo të shtunë dhe të diel shikoja dy gra me fëmijë në oborrin e banesës”, ka treguar ai.
Kujtojmë se shtëpia e barit u zbulua më 11 shkurt. Laboratori ishte zbuluar më herët nga strukturat e Policisë. Nën hetim për këtë ngjarje është vënë edhe kryeplaku i fshatit, ndërsa në kërkim është shpallur Rudina Xhambazi, që kishte marrë banesën me qira. Brenda shtëpisë ishin mbjellë në vazo 247 bimë kanabis, që merrnin dritë nga 45 ushqyes elektrikë, 46 llamba elektrike, 11 freskuese. Gjatë operacionit të zhvilluar u sekuestrua shuma prej 120 mijë lekësh të rinj dhe 7 aparate celulare.
