Mesditën e sotme një person u fut me makinë me shpejtësi në sheshin “Skënderbej” duke vendosur jetën në rrezik jetën e fëmijëve që po luanin, qytetarëve të tjerë, por edhe grupeve të vaksinimit.
Makina ishte e dëmtuar në pjesën e përparme dhe mbetet ende mister si u fut makina në shesh, pasi është i rrethuar nga të gjitha hyrjet me barriera.
Agresori u neutralizua menjëherë nga dy të rinj që ishin të pranishëm. Njëri prej tyre rrëfeu si ndodhi ngjarja e rëndë.
“Ndodhi. E ndalova makinën, vuri në rrezik jetën e qytetarëve dhe mu duk e tepërt, e neutralizova. Nuk e njihja personin, isha rastësisht, pashë që ishte një akt terrorist dhe u mundova. Ndërhyrja për të shpëtuar njerëzit” tha Klodiani, që e nxori nga makina duke e neutralizuar.
Raportohet se drejtuesi i mjetit dyshohet se është në gjendje të droguar pasi me vete i janë gjetur doza kanabis dhe ka përplasur edhe disa makina rrugës.
