Në spitalin e Krujës vijojnë të shfaqen banorë me shenja të helmimit ndërsa deri më tani ka shkuar në 500 numri i personave që kanë marrë mjekim.
Njëri prej të shtrurve ka treguar se ka shkuar në spital në 3 të mëngjesit ndonëse kishte 2 ditë i helmuar.
“Mirë jam. Kam dy ditë që jam helmuar, kam ardhur në 3 të natës për të bërë një serum. Se di sa probleme kam”, tha i shruari.
Bashkëshortja e tij që po i qëndronte pranë tha se edhe vetë ajo është helmuar por e ka kalur situatën në shtëpi.. Ajo tregon se edhe mbesën e saj të vogël e kanë sjellë në spital për serum.
“Burri erdhi natën, edhe vetë kam qenë por jo për serum. Vajza e vajzës ka qenë në serum”, shtoi ajo.
Të shtruarit e tjerë kanë folur për shenjat e helmimit si dhe kanë treguar nëse fqinjët e tyre kanë pasur probleme.
“ Kam temperaturë dhimbje koke, jam shtruar tani. Nga familja vetëm unë jam sëmurë, për komshinjtë se di se jam në shtëpi private. Tani jam pak më mirë”, shtoi një tjetër.
“Edhe komshinjtë e mi kanë pasur probleme”, tha më tej një banor.
Pranë spitalit të Krujës edhe sot janë paraqitur për shërbim mjekësor banorë të cilëve iu janë shfaqur shenja helmimi. Pavarësisht se e kanë ditur që helmimi mund të ketë ardhur nga uji, ata kanë konsumuar ujin rezervë që kanë mbajtur në shtëpi. Në total rreth 500 banorë janë paraqitur me simptoma të helmimit në urgjencë. Kurse nga mesdita e kaluar e deri në këto momente janë rreth 150 veta të cilët janë paraqitur në spital për mjekim. Përzierja e ujërave të zeza me ujërat e bardha dyshohet të jetë bërë shkak i helmimit masiv. /Abcnews.al
