Komiteti i Gjyqtarëve të UEFA-s ka njoftuar se do të jetë Daniele Orsato ai që do të drejtojë finalen e Champions League mes Bayern Munchen dhe PSG-së. Ndeshja e shumë pritur do të zhvillohet ditën e diel në orën 21:00 në stadiumin “Estadio do Sport Lisboa e Benfica”.
44-vjeçari është një gjyqtar ndërkombëtar që nga viti 2010 dhe kjo do të jetë hera e parë që UEFA i beson atij një ndeshje të këtij niveli. Italiani ka drejtuar tetë ndeshje në këtë sezon të Championsit, përfshirë këtu dhe takimin e parë mes Real Madridit dhe Manchester City.
Orsato ka drejtuar dhe një ndeshje çerekfinale të Europa League si dhe sezonin e kaluar ishte gjyqtari i katërt në finalen mes Chelsea dhe Arsenalit. Më poshtë janë dhe gjyqtarët e tjerë, të cilët do t’i vijnë në ndihmë italianit në Lisbonë.
- Gjyqtari: Daniele Orsato ( Itali )
- Ndihmësat: Lorenzo Manganelli, Alessandro Giallatini( Itali )
- Gjyqtari i katërt: Ovidiu Hațegan ( Rumani )
- VAR: Massimtiliano Irrati ( Itali )
- Ndihmësi në VAR : Marco Guida ( Itali )
- Pozicioni jashtë loje VAR: Roberto Diaz Pérez del Palomar ( Spanjë )
- VAR Support: Alejandro Hernández Hernández ( Spanjë )
