Serenatat kushtojnë shumë këtë vit në Korçë. Kryebashkiaku i Korçës, Sotiraq Filo, ka vendosur që për festat e fundvitit të tregojë që drejton qytetin e këngës dhe të serenatave. Ide e mirë kjo e kryebashkiakut, pasi qytetarët kanë nevojë për atmosferë festive, por jo duke iu zhvatur paratë.
Me tenderat me shkelje për hir të festës, kryebashkiaku Filo ta shuan dëshirën për këngë. Kryebashkiaku ka zhvilluar një prokurim me objekt “Loti 1 -Vegla muzikore”, ku parashikohet të blihen, piano, violinë e të tjera. Për këto blerje ai do të marrë nga buxheti i shtetit 51 milionë lekë.
Fatura mund të mos ishte kaq e kripur. Por kryetari Filo ka bërë shkelje të ligjit në procedurat e tenderit të paraprirë me fryrjen e fondit limit.
Filo ka shpallur të hapur mundësinë për dorëzimin e ofertave me 4 nëntor 2024 dhe e ka mbyllur më datë 15 nëntor, në të njëjtën ditë është zhvilluar edhe tenderi pasi kryebashkiaku i ka rënë shkurt këtij tenderi.
Në këtë afat 10 ditë ka dorëzuar një ofertë vetëm firma “ LA BOHEME ” shpk,, në pronësi të Shaban Ibrahimit.
Oferta ishte në vlera rreth 51 milionë lekë, pra sa 100% e fondit limit. Ky është një faktor që përbënë risk sipas rregullave të prokurimit publik. Gjithashtu mungesa e konkurrentëve të tjerë e rëndon çmimin.
Më datë 2 dhjetor 2024 komisioni ka bërë publike kontratën ku ka shpallur fituese pa garë firmën “LA BOHEME ” shpk.
Open Data Albania i ka vendosur tenderit “Flamurin e Kuq”, që është shenja e riskut të korrupsionit.
Ndërsa shtojmë këtu që ky është loti i parë i një projekti që në total shkon 83 milionë lekë, pasi loti 2 me fond 32 milionë lekë ka si objekt blerje kondicionerësh. Nuk e dimë ca lidhje kanë kondicionerët me veglat muzikore, por kryetari e ka ndarë mendjen që do këndojë serenata me paratë e taksapaguesve.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
