Kryeministri Edi Rama ka emëruar drejtorin e Agjencisë së Mbikëqyrjes Policore, Muhamet Rrumbullakun me propozim të Ministrit të Brendshëm Bledi Çuçi. Por edhe pse në media thuhet sikur bëhet një emërim i ri, në fakt e vërteta është që Muhamet Rrumbullaku është në të njëjtin pozicion ku ishte, por ka ndryshuar institucioni që ai ishte drejtues dhe merr ca kompetenca më shumë.
Rrumbullaku mbante postin e drejtorit të Shërbimeve të Çështjeve të Brendshme dhe Ankesave, SHÇBA. Në 20 dhjetor 2021 Kuvendi i Shqipërisë ka miratuar me 76 vota pro krijimin e Agjencisë së Mbikqyrjes Policore, një emërtesë që zëvendëson strukturën aktuale të SHÇBA (Shërbimi për Çështjet e Brendshme dhe Ankesat).
Kjo Agjenci, siç e thamë dhe më sipër, merr disa kompetenca të tjera. Përveçse do të hetojë përveç Policinë e shtetit, edhe Garda e Republikës edhe Shërbimi Zjarrfikës.
Ndërsa në pikën 2 të nenit 5 të ligjit, thuhet se Agjencia do të hetojë edhe nëpunësit civilë dhe punonjësit administrativë, marrëdhëniet e punës të të cilëve rregullohen në bazë të dispozitave të Kodit të Punës. Pra, e thënë me fjalë më të thjeshta, Agjencia mund të luaj deri diku edhe rolin e SHISH, vetëm se në këtë nuk ka akses Presidenti apo kreu i opozitës, por vetëm kryeministri.
Çfarë është Agjencia e Mbikqyrjes Policore
Subjekte që do të hetohen nga agjencia do të jenë edhe Garda e Republikës edhe Shërbimi Zjarrfikës. Por Policia e Shtetit ngelet edhe struktura më e madhe, dhe me impaktin më të madh në radhët e komunitetit.
Emërimi i Drejtorit të Përgjithshëm të Agjencisë do të bëhet nga Kryeministri. Kjo synon ta bëjë agjencinë më të pranueshme në funksion të mbikëqyrjes, më të paanshme, më transparente dhe objektive në perceptimin e publikut dhe jo vetëm.
Agjencia e Mbikëqyrjes Policore do të ketë më shumë kompetenca se sa SHÇBA. Konkretisht, Agjencia ka si objekt parandalimin, zbulimin dhe hetimin e shkeljeve administrative dhe veprave penale në polici dhe gardë, inspektimin, shqyrtimin dhe trajtimin e ankesave, procesin e Vetingut në polici si dhe verifikimin e punonjësve mbi plotësimin e kushteve për pajisjen me certifikatë sigurie.
