Mallrat e importit, tregu i shitjes, apo dhe mungesa e subvencioneve nga shteti ka bërë që prodhimet bujqësore të fermerëve në fshatin Kutalli në Urë-Vajgurore të mbeten stok.
Fermerët deklarojnë se po shkojnë drejt falimentimit sepse shteti jo vetëm që nuk ndërpret prodhimet nga jashtë për të qarkulluar prodhimi vendas por as nuk i ndihmon për TVSH-në, naftën pa akcizë dhe plehrat kimike.
“Është shumë krizë këtë vit në krahasim me vitet e tjera, rreth 30% e prodhimit është hedhur pasi konsumi i brendshëm nuk mund ta konsumojë dot gjithë këtë prodhim, ndërkohë kërkesa për eksport është shumë e pakët pasi jashtë vendit ka akoma prodhim”, shprehen fermerët.
“Ne na ka marrë lumi si fermer. Fermerit nuk i del as për naftën e gjithë vlera e prodhimit. Si prodhues jemi të fundit në Rajon dhe s’kemi pasur asnjë ndihmë nga shteti “, tha një prej fermerëve.
