Fermerët e Dimalit po shkojnë drejtë falimentimit, pasi prodhimet iu kanë mbetur stok. Fshati Goriçan në Kutalli është një nga zonat më prodhuese e cila ka edhe eksportin më të madh në treg, ndërsa ditët e sotme mallrat e fermerëve nuk shiten fare. Mungesa e tregut të shitjes dhe neglizhenca totale e shtetit për t’i ndihmuar me subvencione apo grante, ka bërë që prodhimet e tokave bujqësore në fshatin Goriçan të kalbet e të mbeten stok, kështu ata përvcecse nuk kanë fitime kanë regjistruar humbje të mëdha dhe janë zhytur në borxhe.
Në një prononcim për mediat, Fermerët shprehen se për shkak të mungesës së tregut dhe uljes drastike të çmimit të prodhimit vendas në tregje, prodhimi i tyre u dëmtua dhe u hodh kanaleve. “Ne fermerët kemi falimentuar. Tashmë nuk i mbjellim dot më serat e tokat bujqësore pasi nuk kemi më të ardhura për të investuar në prodhim. Nuk kemi pasur kurrë ndihmë nga shtetit pasi nuk kemi marrë asnjëherë subvencione apo grante. Jemi kredhur në kredi dhe jemi në borxh me furnitorët e pesticideve e fidanëve, tani nuk mund të ushqejmë dot familjet. Bujqësia në Goriçan ka përfunduar, kanalet janë mbushur plot dhe ne s’kemi me se të jetojmë”, shprehen fermerët. Madje, ata tregojnë se druhen që të dalin në media dhe të denoncojnë katastrofën në të cilën ndodhen, pasi kryebashkiaku i Dimalit Dimalit hakmerret në çfarëdolloj forme.
