Ngjan si fantashkencë. Sikur alienët thithin ujin e Tokës. Por në këtë rast ata nuk janë qiellorë. Ata janë nëntokësorë… Një dukuri e rrallë natyrore është konstatuar në liqenin e Marinës në Belsh.
Në këtë liqen është krijuar një hinkë gjigante e cila po përpin ujin e këtij liqeni. Ajo që çudit është se hinka nuk qëndron në një vend por lëviz dhe vazhdon të thithë pa mëshirë ujin e liqenit. Ende nuk dihet se sa do të vazhdojë ky fenomen.
Infoelbasani.al u interesua se përse mund të ndodhë një fenomen i tillë dhe një nga specialistët në Elbasan u shpreh se “kjo mund të ndodhë si pasojë e karstit që tretet në zonën e Dumresë. Tretja e karstit krijon zgavra të mëdha që mbushen me ujë”.
Sipas tij, të gjithë liqenet e Belshit janë krijuar në këtë mënyrë, por në rastin në fjalë është shumë e çuditshme sepse ky liqen ka shekuj që është krijuar dhe poshtë tij nuk ka përse të krijohet karst përderisa është krijuar dhe fundi i liqenit ka qenë gjithnjë me ujë. Gjithësesi fenomeni po tërheq vëmendjen e mjaft studiuesve .
