Një aksident fatal i mori jetën një fëmije 7-vjeçar që kërkonte lëmoshë në rrugët e Tiranës. Pas përplasjes nga një makinë, drejtuesi i së cilës sapo i kishte dhënë ca monedha, mbi trupin e tij kaloi një makinë e dytë. Kjo ishte edhe goditja fatale sepse fëmija ndërroi jetë në spital, ku e kishte dërguar shoferi 55-vjeçar që e goditi i pari.
Altin Hazizaj, drejtori i Qendrës për Mbrojtjen e të Drejtave të Fëmijëve, thotë se situata e të miturve që lypin është e tmerrshme. Shërbimet Sociale nuk reagojnë dhe institucionet vendore nuk kanë bërë mjaftueshëm për ta. Fëmijët janë në vëmendje edhe të policisë për shkak të shfrytëzimit nga grupe të caktuara, thotë Hazizaj.
Drejtoresha e Shërbimit Social, Reme Lala dhe drejtoresha për Mbrojtjen e të Drejtave të Fëmijëve, nuk e kanë pranuar ftesën të bëhen pjesë e bisedës.
“Kur ka shfrytëzim të fëmijëve, është vërtetuar tashmë që ky fëmijë nuk është duke siguruar mbijetesën e vet, nuk ka çfarë të hajë dhe po lyp në rrugë bashkë me familjen, por shfrytëzohet nga familja ose grupe të caktuara që shfrytëzojnë fëmijët dhe ka në Tiranë grupe të tilla. Kur kemi shfrytëzim të fëmijëve, nuk bëhet më fjalë për të ndihmuar me mbështetje sociale e ndihmë ekonomike, por që policia të arrestojë çdo person që shfrytëzon fëmijët”, shprehet Hazizaj.
Ai thotë se ky rast është një konfirmim i mungesës së vëmendjes dhe ndjeshmërisë. Kujtojmë se shoferi 55-vjeçar që goditi i pari fëmijën, fillimisht u largua. Shoferja 42-vjeçare që e goditi më pas, Valentina Koltraku, nuk e ktheu kokën prapa. 55-vjeçari Tomorr Shukulli u rikthye për ta dërguar në spital dhe u largua pa thënë se ishte ai autori.
“Në rastin konkret është fatkeqësi, por duket qartë që kemi të bëjmë me njerëz që nga ana mendore dhe e syve nuk u bëhet vonë. Bëhet fjalë për makina të shtrenjta, ai u mundua t’i jepte edhe monedhën dhe pastaj e shtypi, pastja ke një person tjetër me makinë që kalon mbi atë fëmijë dhe këtu ka të bëjë me gradën e kujdesit që njerëzit duhet të tregojnë kur janë në makinë sepse makina vret. Fakti që jo një, por dy makina e bënë, tregon sa pak të vëmendshëm jemi në rrugë dhe është një ngjarje që duhet analizuar”, thotë Hazizaj.
Më tej, ai nxjerr në pah edhe disa detaje lidhur me situatën e këtyre fëmijëve që shfrytëzohen. Nëse ata nuk plotësojnë një kuotë të caktuar parash, personat që i shfrytëzojnë i lënë të flenë jashtë.
“Shumë nga këta fëmijë nëse nuk arrijnë dot të mbledhin një shumë të caktuar lekësh për t’u kthyer në familjen e tyre dhe përgjithësisht ato lekë i merr një nënë, baba, vëlla apo motër më e madhe, nëse nuk i mbledhin këto lekë, ka qenë më përpara 2 mijë lekë, tani është bërë 5 mijë lekë të vjetra, nëse nuk i mbledhin, janë të detyruar të flenë përjashta”, tha Hazizaj.
Kujtojmë që pak ditë më parë, një operacion i komisariatit nr. 2 arrestoi 4 burra dhe 4 gra në të cilët sillnin të mitur nga Elbasani dhe i shfrytëzonin për të lypur në disa zona në Tiranë. /Report TV
