Gjatë fjalës së tij sot në Parlament, nënkryetari i LSI Petrit Vasili ka ngritur shqetësimin për rritjen e çmimit të energjisë elektrike. Ai tha se qeveria nuk mund të justifikohet me faktin se çmimi është rritur vetëm për ata që shpenzojnë më shumë se 700 kw në muaj, pasi vetëm me përdorimin e pajisjeve bazë në shtëpi, çdo familje mund të arrijë 700 kw, kjo do të thotë që pjesa më e madhe e shqiptarëve do të kenë barrë rritjen e çmimit të energjisë.
Vasili bëri një llogari të konsumit të energjisë nga disa pajisje esenciale në shtëpi, si lavatriçja, soba apo televizori, e që sipas tij e kalojnë lehtësisht konsumin e 700 kilovatëve.
“Na thuhet që gjithçka bëhet për ta mbajtur nën kontroll dhe nuk rrisim çmimet. Dëgjuam se këta shpërdorues të energjisë elektrike që harxhojnë mbi 700 kilovat, do paguajnë më shumë. Është një shtresë shumë e gjerë që ka konsumin mbi 700 kilovat. T’ua shpjegojmë shqiptarëve.
Një frigorifer që punon gjithë ditën harxhon 144 kw, një bolier që punon dy orë në ditë harxhon 240 kw, një televizior që punon 6 orë harxhon 25 kw, lavatriçja një orë në ditë 45, soba vetëm një orë 90 kw, katër llampa 6 orë në ditë harxhon 43 kë, një kondicioner për 4 orë bëjnë 115 kw, të gjitha këto bëjnë 702 kw. Po ku jemi? Jemi që i themi shqiptarëve nuk mund të përdorni stufën më shumë se një orë në ditë se pastaj jeni të pasur, paguani dy apo trefishin. Këto janë tragjikomike” u shpreh ai. Ndërsa i kërkoi qeverisë të marrë masa efektive dhe jo të bëjë propagandë dhe të lërë barrën mbi qytetarët e thjeshtë.
