Është përcjellë për në banesën e fundit 14-vjeçari E.Sakaj, trupi i të cilit u gjet i pajetë ditën e djeshme në ujërat e lumit Seman, në fshatin në Suk 1 të bashkisë Roskovec.
Kjo ishte tragjedia e dytë në këtë familje, pasi vëllai i tij vetëm 7-vjeç është mbytur në të njëjtën mënyrë teksa familja e tyre përballet me vështirësi të shumta ekonomike dhe shëndetësore.
Tragjedia e përsëritur ka ngjallur jo vetëm dhimbje në opinionin publik por edhe akuza për mostrajtimin e familjes Sakaj me ndihmë ekonomike duke e akuzuar pushtetin vendor për neglizhencë.
Bashkia Roskovec nëpërmjet zëdhënëses për komunikimin me mediat Enerida Kuqo u është kundërpërgjigjur këtyre akuzave nëpërmjet një deklarate për mediat.
“Bashkia e Roskovecit i shpreh ngushëllimet familjes Sakaj për humbjen e parakohshme të djalit të tyre. Sa i përket akuzave në rrjete sociale ky është një veprim i turpshëm që individë i përdorin për qëllime të caktuara politike dhe jo politike.
Familja Sakaj, konkretisht një nga vajzat trajtohet sot me kemp paaftësie në masën 11084 lekë. Një nga djemve u është ndërprerë pagesa për kemp aftësie në vitin 2014.
Nga informacioni zyrtar, familja Sakaj është trajtuar me ndihmë ekonomike përpara 4-5 viteve dhe për arsye se një nga familjarët është larguar për emigrim, ju është ndërprerë kjo e ardhur nga sistemi. Pas kësaj, ata nuk janë paraqitur për të aplikuar në sistem për ndihmë ekonomike. Duam të sqarojmë se si ndihma ekonomike dhe trajtimet me kemp paaftësie nuk kanë varësi miratimi nga Bashkia, por nga institucionet e tjera qendrore. Megjithatë bashkia Roskovec, përveç ndihmës financiare do sigurojë edhe varrin si dhe do të bëjmë të mundur për ta përfshirë këtë familje në fondin e 6%-it të ndihmave ekonomike.”
