Lidhur me liberalizimin e vizave për Kosovën, eurodeputeti austriak, Lukas Mandl tha se ka kërkuar që pesë shtetet anëtare të Bashkimit Evropian të njohin sa më shpejt shtetin e Kosovës.
Deputeti i Parlamentit Evropian, Lukas Mandl, ka thënë se Republika e Kosovës, shteti i cili u formua në vitin 2008, ka bërë përparim të konsiderueshëm në përmbushjen e të gjitha kritereve për liberalizimin e vizave.
“Disa shtete anëtare të BE-së ende bllokojnë liberalizimin e vizave për kosovarët, e cila u rekomandua nga Komisioni dhe u vendos nga Parlamenti Evropian. Si rezultat, kosovarët në Ballkanin Perëndimor ende nuk kanë liri për të udhëtuar. Dhe një ekonomi që tashmë po e ka të vështirë për rimëkëmbje, është ngarkuar me tarifa të panevojshme për viza.Shumica e të rinjve atje janë të uritur për arsim dhe për të punuar. Fushat e zhvillimit të softuerit dhe inxhinierisë së softuerit në veçanti mund të japin një kontribut të rëndësishëm në forcimin e ekonomisë. Në planin afatgjatë, Kosova madje mund të bëhet një lloj” Silicon Valley” në Evropë”, thotë Lukas Mandl, njëherësh kryetar i shoqatës së Miqësisë Austri – Kosovë.
Mandl ka thënë se aktualisht Kosova ka një sfidë para vetes që është zgjedhja e presidentit të ri. “Kjo duhet të bëhet me marrëveshje mes partive politike dhe pa zgjedhje të reja parlamentare. Zgjedhjet e reja do t’i kushtojnë Kosovës kohë të vlefshme, i shpenzojnë forcë dhe energji. Në anën tjetër, BE-ja duhet ta mbajë premtimin e saj dhe të japë liberalizimin e vizave”, thotë Mandl.
Eurodeputeti austriak që është nga partia ÖVP e Sebastian Kurz u ka bërë thirrje edhe pesë shteteve, anëtare të BE-së që ta njohin sa më shpejt shtetin e Kosovës. Po ashtu ai ka përshëndetur edhe vazhdimin e dialogun mes Kosovës dhe Serbisë.
