Këtë të hënë, ka filluar në Maltë, Kampionati Europian U19, ku marrin pjesë 8 ekipe. Pas ndeshjes hapëse të turneut, të zhvilluar pasdite, ku Portugalia mposhti 2-0, Poloninë, është luajtur edhe takimi tjetër i grupit A, ai mes organizatorëve të Maltës e Italisë.
Ashtu si pritej, “fqinji” verior i Maltës, bëri detyrën duke mposhtur “të kuqtë” me rezultatin 4-0, në një takim që pati disa polemika për penalltitë e akorduara nga gjyqtari, në favor të “të kaltërve”.
Në minutën e 19’, Ndour zhbllokoi shifrat nga pika e bardhë e penalltisë, duke mposhtur me lehtësi portierin e Maltës, Sako.
Malta kërkoi të barazonte rezultatin por, sulmet e tyre nuk ishin mjaftueshëm efikase, për të vënë në presion mbrojtjen italiane.
Në minutën e 32’, u akordua një tjetër penallti për kombëtaren italiane, me maltezët që e kontestuan ashpër vendimin. Esposito, nuk gaboi duke shënuar golin e qetësisë për Italinë.
Tashmë të demoralizuar, vendasit u munduan që të limitonin dëmet, megjithatë, arbitri i takimit, izraeliti Frid, akordoi, në minutën e 40’, një penallti inekzistente për italianët, duke gabuar dyfish më pas, me nxjerrjen me të kuq, të kapitenit të Maltës, Micallef, i cili në momentin e ndërhyrjes, nuk bën aspak kontakt me sulmuesin italian.
Megjithatë, D’ Andrea gaboi, duke e dërguar topin te pista e atletikës. Ky ishte rasti i fundit i rrezikshëm për pjesën e parë.
Në pjesën e dytë, Italia nuk u vu në rrezik aspak, me Maltën që ishte e fokusuar vetëm, në limitimin e dëmeve por, në minutën e 47’, Italia shënoi nga një goditje dënimi, me D’ Andrean që korrigjoi gabimin e tij duke vënë emrin e tij, në listën e golashënuesve.
Në minutën e 91’, arbitri tregohet përsëri amator, duke akorduar një tjetër penallti shumë të dyshimtë për italianët, të cilët nuk falin, me Vignato që shënoi dhe golin e katërt.
Deri në fund, nuk pati më histori, me Italinë që mori tre pikë të rëndësishme në takimin hapës të UEFA EURO U19./m.b /gijotina.com
