Kryetari i Bashkisë Berat, Ervin Demo, bashkë me atmosferën e Krishtlindjes sjell me një tender edhe “shkëlqimin” e parave që i shpërndan si magjistar. Edhe pse përpara kemi festat e Nëntorit, kryetari Demo ka nisur nga puna për dekorin e festave të fundvitit. Ai ka zhvilluar një tender me objekt ‘Blerje materiale dekori’ me fond limit 144 milionë lekë.
Sipas të dhënave të paraqitur në tender kërkohen topa, yll dhe instalacion në formë dëbore për t’i vendosur tek pema e Krishtlindjeve, drita, kabull dhe shirita zbukurues.
Për këto xhinga-mingla do të dalin nga arka e bashkisë 144 milionë lekë të mbledhura nga xhepat e qytetarëve që me zor arrijnë të paguajnë taksat. Nëse llogarisim TVSH, kontrata pritet të shkojë akoma më shtrenjtë.
Gara për tenderin është hapur më datë 19 shtator 2024 dhe është mbyllur më 7 tetor, periudhë gjatë të cilës janë dorëzuar 5 oferta të ndryshme. Edhe pse ka kohë që të sigurojë zbukurimet për festat, Demo ka nxituar me këtë tender.
Komisioni i vlerësimit fillimisht në fazën e parë ka fshirë ofertat e 3 operatorëve, madje edhe ato dy më të lirat që ishin në vlerën 100 milionë lekë.
Nëse merreshin në konsideratë këto oferta, do të kurseheshin 44 milionë lekë nga fondi limit.
Por, Demo kaloi për në finale vetëm ofertën e kompanisë KOLOSEU SHPK me vlerë rreth 130 milionë lekë, 14 milionë lekë më shtrenjtë se kompanitë e skualifikuara dhe shumë afër fondit limit. Këtu u regjistrua shkelja e dytë.
Pasi u eliminua konkurrenca, kontrata u firmos pa garë fare! Kjo kontratë abuzive u në publike më datë 16 tetor 2024 dhe Open Data Albania i ka vendosur menjëherë ‘Flamurin e kuq’, që është shenja e riskut të korrupsionit.
Duam t’iu theksojmë se fondi prej 144 milionë do të shkojë vetëm për zbukurimet dhe ndriçimin e pemës, ndërsa për dekoret e tjera sigurisht që do të bëhen shpenzime shtesë.
Ajo që të bën përshtypje në këtë tender është përzgjedhja për zbukurimet e festave, të kompanisë që shëmton mjedisin me guroren e saj në Berat. Kompania me pronar Jani Qosjen nuk merret me zbukurime, por ka lidhjet e duhura familjare dhe politike që i japin përparësi për t’i marrë këto lekë të bashkisë Berat.
Ju kujtojmë se në vitin e shkuar Bashkia Berat shpenzoi 931 365 euro për dekore. Ndërsa këtë vit e ka nisur me fryrje të shpenzimeve!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/201
