Ermal Dredha do të mbahet mend si kryebashkiaku që e la qytetin e Vlorës me rrugë të prishura në çdo lagje. Vlora sot ka vetëm Bulevardin dhe Lungomaren, ndërsa rrugët e tjera kanë deri në dy dekada pa mirëmbajtje. Edhe ndonjë fond i vogël që i bie në dorë, kryetar Ermali e dërgon për rrugica fshatrash. Ndoshta është strategji elektorale, por mbase fshihet diçka tjetër në këtë mes. Bëhet fjalë për tenderin me objekt ‘Rikonstruksioni i rrugës së fshatit “Drithas”’.
Ky fshat ndodhet 30 minuta me makinë larg qytetit të Vlorës dhe pjesa kryesore e rrugës është e shtruar. Sipas dokumenteve të tenderit, do të shtrohet një pjesë e rrugicës lidhëse brenda fshatit (pjesa me të verdhë).
Në preventiv theksohet se rruga është ekzistente, gjerësia e saj nuk do të ndryshojë, por t’i hidhet një shtresë asfalti 4-5 cm, sipas nevojës (nënkupto mbushje gropash).
Bashkia ka ndarë 150 milionë lekë, fond me të cilin mund të ishte shtruar gjithë fshatit.
Cenimi konkurrencës
Ndërkohë më poshtë shohim se kontratat është firmosur në shkelje të ligjit mbi prokurimet, nuk u zhvillua një garë ligjore. Në këtë tender kishte mundësi për një konkurrencë të rregullt, pasi kanë shfaqur interes 6 kompani me oferta që varionin nga 82 milionë lekë tek ato me 120 milionë lekë.
Çështja është se dy ofertat më të lira u skualifikuan nga gara sepse nuk kishin dokumente që kanë kryer punë të ngjashme më parë, edhe pse në fakt vetë Bashkia Vlorë ka disa projekte me këto firma. Menjëherë më pas janë skualifikuar edhe 3 ofertat e tjera, për të cilat nuk është dhënë asnjë argument.
Ashtu siç ka qenë e paracaktuar, në fazën e fundit shkoi vetëm firma AVDULI SHPK, në pronësi të Arben Avdulit, me ofertë 106 milionë lekë.
Open Data Albania i ka vendosur tenderit “Flamurin e Kuq” për riskun e korrupsionit. Ky është një sinjal alarmi që APP dhe instancat e tjera nuk duhet ta anashkalojnë, pasi kryetar Ermali po i dredhon me fondet!
Sakaq, kujtojmë këtu që Arben Avduli është një emër i njohur, pasi emri i tij doli tek përgjimet e SPAK ndaj ish-kryebashkiakut të Lushnjës, Fatos Tushe që u dënua për korrupsion. Në atë rast Avduli ishte ai që ankohej se Tushe bënte tendera korruptive dhe e skualifikonte nga gara pa të drejtë kompaninë e tij. Në këtë rast është vetë Avduli që përfiton duke u favorizuar nga një kryetar bashkie.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
