Opozita mbajti paraditen e kësaj të mërkure protestën e përjavshme përpara bashkisë së Tiranës, ku përsëriti kërkesat për dorëheqjen e kryebashkiakut Erion Veliaj dhe arrestimin e tij.
Kryebashkiaku u cilësua koka e aferës së inceneratorit të Tiranës dhe drejtuesi i bandës së drejtorëve hajdutë. Në protestë u hodhën akuza ndaj SPAK se pavarësisht provave, Veliaj po mbrohet nga prokuroria.
Protestuesit respektuan me një minutë heshtje Arben Tafajn, i cili ndërroi jetë një ditë më parë. Kërkesa për nderimin e tij u bë nga Sekretari i Përgjithshëm i Partisë së Lirisë, Tedi Blushi. Më pas në fjalën e tij, Blushi tha se tani është koha për protesta para SPAK.
“Kjo është e vetmja ditë në javë kur ai nuk ka mundësi të vjedhë, pasi nga frika e protestës ai e braktis këtë godinë. Ne jemi këtu çdo javë dhe kërkojmë drejtësi”. Ai i ftoi qytetarët që më 6 dhjetor në ora 12:00 të protestojnë përpara SPAK, institucionit që sipas tij “sot mban në këmbë Erion Veliajn dhe pushtetin e Edi Ramës”.
Koordinatori politik i Partisë Demokratike për Tiranën, Klevis Balliu, preku problemin e ndotjes. Ai u shpreh se Tirana sot është qyteti më i ndotur në Europë. Balliu tha se “qytetarët paguajnë taksa dhe sërish kazanet e plehrave janë plot”.
“Bashkia Tiranë ka 500 milionë euro në vit buxhet, janë taksat që paguajnë qytetarët. Qytetarët paguajnë taksa dhe kazanët e plehrave nuk pastrohen. Në Tiranë kanceri gjen aleat. Aleati i kancerit është Erion Veliaj, sepse ndotja e kryeqytetit është realitet kudo edhe në spitale”, tha Balliu.
Pjesë e protestës ishte edhe aktori Mehdi Malkaj, i cili gjatë fjalës së tij u bëri thirrje të gjithë pensionistëve të ngrihen dhe të protestojnë kundër padrejtësive dhe abuzimeve.
Aktori tjetër Neritan Licaj kujtoi dhunën e pushtetit në shembjen e godinës së Teatrit Kombëtar.
Aktrja Juli Emiri, u shpreh se ky pushtet nuk lufton për mirëqenien e qytetarëve, por për të rritur pasurinë e tyre.
Këshilltari demokrat në Bashkinë Tiranë Dorian Teliti u ndal te votimi i djeshëm i socialistëve në Kuvend, që rrëzuar amendamentet e opozitës në projektligjin për buxhetin 2025.
“Kartonat e mazhorancës, plot 75 prej tyre ngaqë nuk kanë dalë nga vota e ndershme e qytetarëve, por kanë dalë nga krimi e korrupsioni i thanë dje jo vendosjes së minimumit jetik në vend”, tha ai.
Koordinatorja për Departamentet në Partinë Demokratike, Silvi Bardhi, u shpreh se korrupsioni ka pushtuar jo vetëm Bashkinë e Tiranë, por të gjitha bashkitë e vendit nën drejtimin e socialistësve.
Aktivistja Adriana Kalaja e quajti Erion Veliaj “bandit” dhe solli në vëmendje paditë ndaj saj nga kryebashkiaku.
“Të nesërmen, kur unë kallëzova në SPAK një kriminel, një hajdut si Arjola Xoxa që çuditërisht na u bë dhe artiste, ky bastardi shkon në Gjykatën Administrative dhe thotë: ‘Adriana Kalaja do të më paguajë 300 mijë lekë sepse ka dëmtuar bashkinë gjatë protestave’. Në fakt, mua më bëhet qefi sepse i shikohet çfarë halli i madh i ka zënë. Më bëhet qefi sepse edhe ata vetë e dinë që nuk i shpëton as Altin Dumani, dhe askush, sepse do japin llogari para ligjit”, tha ajo.
Protesta zgjati gati një orë dhe nga mikrofoni i tubimit u premtua se do të protestohet deri në arritjen e objektivave.
