Iku një drejtor dhe erdhi drejtoresha pas rokadës në krye të Drejtorisë së Tatim Taksave të Tiranës, por raporti me “DATECH” nuk ndryshon. Kompania merr fondet për “mirëmbajtje të platformës online” me porosi nga kryetari Erion Veliaj. Në këto kushte drejtoresha Laura Deliu thjesht i ka firmosur një kontratë të re kompanisë “DATECH” që është “copy paste” me të vjetrën.
Pra, që të jemi më të saktë, Erion Veliaj i rinovon kontratën Lulëzim Bashës. Më datë 25 tetor 2024, komisioni ka mbyllur “garën” për tenderin me objekt “Shërbim i Zhvillimit të Mirëmbajtjes së Programit të Taksave dhe Tarifave”. Janë vënë në dispozicion 57 milionë lekë për të mirëmbajtur sistemin online.
Theksojmë se tenderi ka qenë i anuluar një herë. Në këtë tender nuk afrohet asnjë kompani, sepse dihet fituesi qysh më parë.
Prokurimi i parë është hapur më 17 shtator 2024 dhe “Për mungesë ofertash të përshtatshme”, procedura është anuluar më 2 tetor 2024.
Pas kësaj është rihapur tenderi me të njëjtat të dhëna. Procedura qëndroi 10 ditë e hapur dhe ishte dorëzuar vetëm një ofertë, ajo e firmës DATECH, në pronësi të Lulëzim Bashës. Nuk është Lulzimi që ne njohim në politikë si kryetar partie apo deputet, por privilegjet që Veliaj i ka dhënë të mëdha.
Komisioni i Laura Deliut e ka mbyllur “garën” sapo ka regjistruar ofertën e DATECH, sepse aq i mjaftonte. Në të njëjtën ditë është mbajtur edhe zhvillimin e tenderit. Në fakt me një ofertë të vetme me vlerë sa fondi limit, procedura nuk duhej të vazhdonte, pasi ka mungesë konkurrence dhe risk për fondin limit.
Por kur direktiva është e Veliajt, komisionit nuk i intereson rregulli.
Në fakt kemi të bëjmë me një tender fiktiv që përdoret për të rinovuar kontratën e “DATECH”. Prandaj pa e zgjatur shumë është firmosur formulari me fitues Bashën, e cili është bërë publik më datë 5 nëntor 2024.
Vlerësimi me “Flamurin e Kuq” nga Open Data Albania tregon riskun e korrupsionit.
Theksojmë se kjo firmë ka qenë e kontraktuar që nga viti 2020 për të mirëmbajtur sistemin e taksave. Tenderi në atë kohë u zhvillua me shkelje dhe gjithashtu u vlerësua me “Flamurin e kuq” me shënimin “Skualifikim i të gjithë operatorëve ekonomik përveç fituesit”.
Kompania pasi e ka kapur këtë kontratë ka vazhduar t’i fitojë tenderat e mirëmbajtjes.
Në tetor të vitit 2022, Gijotina.com ka analizuar prokurimin me objekt “Shërbimi i Zhvillimit të Mirëmbajtjes së Programit të Taksave dhe Tarifave Vendore dhe ëebservice-ve”. Kishte një fond me vlerë 57 milionë lekë, por i përcaktuar për 2 vite, ndërsa me tenderin e radhës do të shpenzohen kaq para për vetëm një vit. Pra është rritur fondi, por jo shërbimi.
Edhe në vitin 2022, tenderin e fitoi firma DATECH pa garë fare. Ishte situatë e njëjtë, pa konkurrent përballë dhe me ofertë sa 100% e fondit limit.
Ja pse themi që kjo procedurë ishte sa për sy e faqe, si vulosje për rinovim kontrate.
Ndërkohë tregon që Basha i ka rrënjët e thella dhe ka mbështetje nga lart. Në dokumente shohim se “Datech” ka si degëzim një tjetër firmë, të quajtur “FBS” sh.p.k, e cila gjithashtu njihet për një sërë tenderësh të marra në shkelje të ligjit.
Kjo kompani ka ortakëri mjaft të mirë me kompaninë e Ilir Beqajt “Intech+” . Kjo firmë tashmë administrohet nga Sokol Sinani, por themeluesi i saj ishte Ilir Beqaj.
Sëbashku me ‘FBS” sh.p.k, kjo firmë është përfshirë në një super skandal në 2020. E ndihmuar nga Beqaj, “FBS” ka arritur të marrë tender pa garë me vlerë 2.4 miliardë lekë, për mirëmbajtjen e sistemeve të financave, prokurimeve dhe buxhetit, me afat 12 muaj.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
