Në një deklaratë, Presidenti turk Rexhep Taip Erdogan është shprehur se Turqia e ka për detyrë të mposhtë Shtetin Islamik. Sulmet e ndërmarra kundër militantëve në Siri ditën e shtunë, Presidenti i konsideroi si hapin e parë të luftës ndaj Shtetit Islamik, ndërkohë që ai premtoi se nga kjo luftë nuk do të shpëtojë as Partia e Punës së Kurdistanit dhe grupet e klerikut Fetullah Gulen.
“Turqia e ka për detyrë të mposhtë të ashtuquajturin Shtet Islamik në Sirinë fqinje”.
Kështu është shprehur Presidenti Rexhep Taip Erdogan, i cili më tej ka thënë se militantët nuk do të kenë më mundësinë të veprojnë në Turqi.
Ushtria turke ka deklaruar se avionët ushtarakë kanë vrarë 20 luftëtarë të Shtetit Islamik, gjatë një sulmi ajror mbi Sirinë të shtunën.
Ndërkohë që të hënën, në Siri pritet të fillojë një armëpushim 10-ditor, i ndjekur nga sulme ajrore të koordinuara kundër militantëve xhihadistë.
Marrëveshja për armëpushim u arrit të premten mes Shteteve të Bashkuara të Amerikës dhe Rusisë, e cila është një aleate e presidentit sirian Bashar al-Assad.
Në deklaratën e tij, Erdogan u shpreh se misioni aktual i ushtrisë turke në Siri, është vetëm hapi i parë i luftës ndaj Shtetit Islamik.
Sipas presidentit, Turqia është e vendosur të mposhtë edhe Partinë e Punës së Kurdistanit dhe grupet e mbështetura nga kleriku Fethullah Gulen, të cilin ai e akuzon si organizator të grushtit të dështuar të shtetit në korrik.
