Policia kriminale ka identifikuar fotografinë e automjetit të përdorur në atentatin e një muaji më parë në Fushë Krujë ku mbetën të vrarë Brilant Martinaj dhe dy shokët e tij Besmir Hoxha dhe Diklen Vata.
Makina rezulton se ka hyrë në Shqipëri nga Kosova dhe është pajisur me targa të një mjeti tjetër të vjedhur. Krerët e policisë kanë hartuar edhe një listë personash që duhet të merren në pyetje në lidhje me ngjarjen.
“Ora News” shkruan se makina e kapur nga kamerat filmike të bizneseve, ka qarkulluar në zonë, me targën “AA 156 OR”, dhe në këtë imazh besohet se është në momentin e largimit nga vendi i ngjarjes. Nga analizimi i pamjeve filmike të sekuestruara nga policia e kriminale besohet se me këtë mjet kanë lëvizur 4 persona të armatosur për të kryer vrasjen.
Imazhet e saj të nxjerra nga kamerat e sigurisë, janë krahasuar me imazhin e automjetit të djegur pas atentatit dhe ka rezultuar se makina është e njëjtë, por autorët janë kujdesur të mos lenë asnjë gjurmë në të, duke i vënë zjarrin dhe shkrumbuar çdo provë të mundshme së bashku me armët.
Prej këtej autorët janë larguar me një automjet të dytë, duke mos lënë asnjë gjurmë. Njëherësh mjetit, sipas policisë i është fshirë numri i shasisë, duke sjellë një vështirësi serioze, për identifikimin e pronarit të tij. Sipas verifikimeve të kryera makina ka hyrë në territorin e Shqipërisë nga Kosova, duke përdorur pikën kufitare të Morinit dhe policia po punon, se kush janë njerëzit që kanë futur këtë makinë në Shqipëri.
Njëherësh është zbuluar, se mjetit i janë vendosur targat “AA 156 OR” që i përkasin një makine tip “Daimler Chraisler” në emër të shtetasit me inicialet, A.L. Targat rezultojnë të denoncuara si të vjedhura në policinë e Tiranës gati 1 vit më parë.
