Modelja shqiptare me famë botërore Emina Cunmalaj pret të bëhet nënë e një vajze për pak javë. Në një intervistë për revistën Class ajo ka treguar emocionet e shtatzanisë, ndryshimin e trupit gjatë kësaj periudhe dhe marrëdhënien me bashkëshortin. Emina do të ketë një “përrallë” të bukur për ti treguar së bijës, përrallën e jetës së saj, nga një vajzë fshati që preku pasaralet dhe kopertinat më të famshme të botës, një hirushe që sot ndihet mbretëreshë nga dashuria e burrit që ka në krah.
“Shtimi i 20 kilogramëve deri tani dhe, mos harroni që kam edhe disa ditë, kështu që mund të shtoj edhe disa kile, ka qenë diçka me të cilën duhej të mësohesha sepse unë nuk kam pasur kurrë një peshë të tillë. Më duket sikur pjesa më e madhe e asaj që kam shtuar është e bebit, por në të vërteë, pjesë të ndryshme të trupit kanë ndryshuar: zona e vitheve dhe ijëve, gjoksi…të gjitha janë rritur me disa numra, por nuk jam e mërzitur. Nuk jam e nevrikosur dhe as e trishtuar. Është thjesht një ndryshim dhe unë jam OK me të, sa kohë fëmija im është i shëndetshëm”, thotë ajo për shtatzaninë.
Por sapo të lindë do ti kthehet modelingut, madje nuk ka hequr dorë as gjatë kësaj kohe. “Po, planifikoj të kthehem. Kam punuar në fakt, edhe gjatë kësaj kohe, për një linjë veshjesh shtatzënie Old Navy (një kompani amerikane). Karriera zë një vend shumë të madh në jetën time kështu që nuk do ndaloj kurrë 100%, por do ngadalësoj pak, që të mund të kaloj më shumë kohë me time bijë’, thotë Emina.
Pasi tregon për historinë e saj, e lindur në SHBA, rikthyer në një fshta të Malit të Zi ku kaloi fëmijërinë deri 15 vjeç duke lozur nëpër fusha, dhe jetën në kryeqytetet më të bukura të botës, mungesën e nënës që i është ndarë nga jeta dy vite më parë, Emina me plot gojën thotë se “jeta është e mrekullueshme”.
“Unë kam kaluar nga një jetë shumë e thjeshtë në fshat, kam pasur një karrierë fantastike dhe kam jetuar në vende si New York apo Paris dhe tani jam martuar me një burrë të mrekullueshëm që më do dhe më trajton si mbretëreshën e tij dhe jam duke pritur fëmijën time të parë. Jam e bekuar dhe e di që kjo vjen ngaqë mamaja ime është engjëlli im që më sheh nga lart dhe më mbron”, shprehet ajo.
