Dinamika e ngjarjes për vrasjen e Nazmi Bandullës mëngjesin e djeshëm në Shkodër, ngre dyshime se ekzekutimi është kryer nga vrasës me pagesë.
Në vendin e ngjarjes janë gjetur shumë pak prova që mund të ndihmojnë në hetimin e ngjarjes, duke shtuar dyshimet se ekzekutimi i Bandullës ka qenë i mirëogranizuar.
Autorët kanë pritur momentin dhe kohën e duhur për të qëlluar me breshëri drejt tij. Rreth orës 08:15 kur është kryer vrasja, zona nuk kishte qarkullim të automjeteve apo banorëve të lagjes.
Dyshohet se Bandulla u vëzhgua nga larg, dhe më pas u ndoq deri te kafeneja në lagjen “Partizani” ku 55-vjeçari ishte ulur në ambientet e jashtme.
Nga hetimet paraprake, gijotina.com ka mësuar se autorët të cilët dyshohet se ishin dy kanë ndaluar me një makinë tip “BENZ” të bardhe dhe xhama të zinj, kanë hapur xhamin dhe kanë qëlluar me breshëri drejt Bandullës duke e lënë të vdekur në vend. 13 plumba u gjetën në vendin e ngjarjes ndërsa 6 plumba u gjetën në trupin e viktimës. Fill pas krimit, autorët janë larguar në drejtim të paditur.
Nga të dhënat e mësipërme, duket se gjithçka është organizuar për të kryer me sukses vrasjen e Bandullës, një person me rekorde kriminale në vend. Nisur nga e shkuara kriminale e viktimës, pista kryesore ku janë përqendruar hetimet janë larja e hesapeve, dhe përfshirja e 55-vjeçarit në grupet kriminale.
Për të ndihmuar në hetime dhe identifikimin e autorëve, policia ka shoqëruar rreth 20 persona, familjarë e banorë të lagjes për të dëshmuar. 5 nga personat e pyetur janë dëshmitarë okular. Përpara grupit hetimor ata janë shprehur se nuk kanë mundur të identifikojnë ekzekutuesit, përveç faktit që autorët udhëtonin me një automjet tip “BENZ”, me xhama të zinj.
Gjithashtu hetuesit kanë pyetur edhe familjarë të viktimës, por edhe këta nuk kanë dhënë asnjë ndihmesë për hetimin.
Policia ngriti postblloqe duke kontrolluar mjetet që qarkullonin në disa akse rrugore, por pa rezultat për identifikimin dhe kapjen e autorëve të kësaj ngjarjeje.
Deri në një moment të dytë të hetimeve, shpresojmë që kjo ngjarje mos u shtohet dosjeve të tjera kriminale që kanë zënë pluhur në prokurori duke lënë hetimet për gjysmë.
