Nuk ka ende asnjë gjurmë nga autorët e vrasjes së 19- vjeçarit disa ditë më parë në Shkodër, ngjarje që tronditi jo pak opinionin publik.
Dyshimet e deritanishme referuar hetimeve paraprake janë se shkak i atentatit është bërë përfshirja e 19- vjeçarit në banda kriminale që funksionojnë në kryeqendrën e veriut.
Mbrëmjen e sotme Drejtori i Përgjithshëm i Policisë së Shtetit, Muhamet Rrumbullaku së bashku me drejtues te Departamentit të Krimeve në Drejtorinë e Përgjithshme, ka kryer një vizitë blic në Shkodër.
Ai është takuar me drejtues të lartë të Policisë së Shkodrës, ku ka kërkuar zbardhjen e atentatit.
Drejtori Rrumbullaku ka kërkuar administrimin e të gjithë provave që disponon policia ndërkohë që sektori i kriminalistikës pranë Drejtorisë së Përgjithshme është vënë në dispozicion të grupit hetimor për zbardhjen e kësaj ngjarje të rëndë që ka tronditur Shkodrën.
Burimet bëjnë me dije se takimi ka zgjatur rreth një orë në ambientet e Drejtorisë së Policisë në Shkodër.
