Zhane Zari akuzon në gazetën “Panorama” të bijën, këngëtaren Eda Zari, për falsifikim dokumentesh në marrjen e pronave të familjes, ku pjesëtarë janë edhe fëmijët e tjerë: “E kam të vështirë më besoni, se jam një grua që i ka kaluar të ’70-at dhe kurrë s’e kam menduar se do të përballesha në këtë moshë me vajzën time të vogël, Edën, të cilën bashkë me bashkëshortin e çuam që 17 vjeç në Gjermani, ku filloi studimet në muzikë, pra i mundësuam një jetë ndryshe për ta çuar më tej talentin e saj”,- tregon e ëma.
Zhaneja shprehet se Eda ka përvetësuar padrejtësisht dy prona të familjes, duke falsifikuar dokumentet, dhe pasi i ka kërkuar sqarim në telefon, ajo është mërzitur shumë dhe tashmë nuk komunikojnë fare. “Bëhet fjalë për një apartament në Durrës dhe një dyqan 64 metra katrorë në lagjen “21 Dhjetori” në Tiranë”. Nëna tregon se apartamenti ka kushtuar 50 milionë lekë dhe i shoqi ka paguar në dorë 20 milionë, ndërsa pjesën tjetër ka rënë dakord ta paguajë me këste nga 1 milion e gjysmë të vjetra çdo muaj. Pas vdekjes së të atit, Eda ka paguar këstin e fundit dhe ka shtuar në dokumentet origjinale, të cilat i ka falsifikuar, emrin e saj para emrit të babait, pra nga blerësi Ismail Zari, ajo e ka bërë Eda Ismail Zari: “Eda këmbëngul që shtëpinë në Durrës e ka blerë vetë ajo, ndërsa unë jam dëshmitare që atë shtëpi e kam blerë me bashkëshortin”,- nënvizon e ëma. Nëna tregon se bashkë me bashkëshortin janë marrë biznes dhe kanë qenë në gjendje të mirë financiare, dhe të tre fëmijët i kanë shkolluar jashtë. Tashmë Eda edhe dyqanin e ka hipotekuar si pronë të saj. “Edhe pjesën time, edhe të burrit, Eda e hipotekoi si pronë të sajën, të cilën e kishim lënë me qira 800 mijë lekë në muaj.
Madje ajo tani i ka thënë qiradhënësit që të mos m’i japë mua lekët e qirasë, por asaj, sepse është ajo pronarja”. Ajo tregon se Eda jeton shumë mirë me bashkëshortin financier dhe dy djemtë, dhe se ua ka bërë të qartë fëmijëve që deri sa ajo të vdesë, pronat do të jenë të saj, më pas do të ndahen në mënyrë të barabartë mes tyre: “Në fakt, dua të gjej avokatin e duhur për të zgjidhur këtë çështje. Për sa i përket sedrës, nuk mendoj se Eda vendoset në sedër kollaj. Jeta në Gjermani e ka bërë të ftohtë”,- shpjegon ajo. Zhaneja tregon se tashmë ajo jeton krejtësisht e vetme dhe ajo nuk kujdeset për të. /Tema/
