Një ngjarje e rëndë është regjistruar në Maqedoninë e Veriut, ku një i moshuar ka abuzuar me një fëmijë vetëm 8 vjeç. Sipas mediave maqedonase, prokurori publik nga Prokuroria Themelore Publike Manastir, ka nxjerrë Urdhër për zhvillimin e procedurës hetimore ndaj personit i cili dyshohet se ka kryer vepër penale – sulm seksual ndaj fëmijës nën moshën 14 vjeçare.
Ngjarja dyshohet se ka ndodhur më 25 shtator, në shtëpinë e tij në Manastir, ku i dyshuari 71-vjeçar ka kryer akte seksuale ndaj një fëmije 8-vjeçar, të cilin e ka mbyllur në banesë.
Prokurori publik i ka dorëzuar gjyqtarit të procedurës paraprake nga Gjykata Themelore në Manastir propozim për caktimin e masës së paraburgimit për të dyshuarin. Gjykatësi e ka pranuar propozimin dhe i ka caktuar të dyshuarit masën e paraburgimit prej 30 ditësh.
