Sipërmarrësi Gramoz Memaj mbeti i vrarë si pasojë e një atentati mbrëmjen e djeshme në Ksamil. Memaj u qëllua pranë banesës së tij dhe për shkak të plagëve të marra ndërroi jetë.
Burime nga grupi hetimor bëjnë me dije se dyshohet që ngjarja të ketë ndodhur për larje hesapesh. Kjo është edhe pista kryesore, ku është fokusuar policia. Besohet se kanë qenë katër persona që kanë qëlluar ndaj Memajt.
Ndërkaq, arma e përdorur në krim është e tipit pistoletë.
Gramoz Memaj ishte nga Tepelena dhe njihej si biznesmen në zonën e Ksamilit. Mësohet se Memaj jetonte vetëm me të ëmën dhe nuk qe i martuar.
