Reperët e njohur Stresi dhe Noizy nuk kanë pasur marrëdhënie të mira në të shkuarën, por prej një viti ata janë pajtuar, duke i lënë mbrapa mosmarrëveshjet që kishin mes tyre.
Të gjithë u habitën kur ata bënë paqe, por askush nuk e priste që marrëdhënia e tyre do evoluonte kaq shpejt dhe ata të bëheshin shokë të ngushtë.
Pak ditë më parë, komentet mes tyre në rrjetin social Instagram bënë xhiron e rrjetit me Stresin që i kërkonte Noizyt një kostum nga koleksioni i ri dhe Noizyn që e konsideroi atë familje.
Ajo që po çmend edhe më shumë fansat e dyshes së hip-hopit është një detaj që tregon se Stresi i ka dhuruar Noizyt një nga orat e tij. Kjo vërtetohet me një foto që ka publikuar Noizy në faqen e tij në Instagram, ku krahas saj shkruhet “Faleminderit”. Ky gjest forcon edhe më shumë dyshimet se Stresi ia ka dhuruar orën si një gjest simbolik.
Kujtojmë se, dy reperët e nisën bashkë rrugëtimin e tyre në muzikë, si dy shokë të mirë, mirëpo më pas rrugët e tyre u ndanë për motive ende të paqarta, teksa kohët e fundit i kanë konsideruar “gabime adoleshence”. Fansat po ashtu u ndanë në dy grupe, duke u përplasur shpesh në rrjetet sociale, por jo vetëm. Diss-et e pafundme, deklaratat e forta për njëri-tjetrin në distancë, apo edhe përplasjet fizike mes tyre a shokëve e bashkëpunëtorëve vite më parë na kishin krijuar konceptin e një armiqësie të fortë mes tyre që s’do shuhej ndonjëherë.
Por, së fundmi prej asaj kohe dy çunat kanë mbështetur projektet e njëri-tjetrit në rrjetet sociale, teksa nuk kanë munguar komentet edhe as takimet. Tashmë fansat janë të bindur se ata do sjellin edhe një bashkëpunim ndonëse nuk ka asnjë konfirmim zyrtar. Megjithatë pak kohë më parë Stresi e la të hapur mundësinë e një dueti mes tyre.
