Pas marrjes së pushtetit nga talebanët, Afganistani po përballet me një krizë humanitare, pasi qytetarët afganë po shesin sendet e tyre të çmuara për të paguar ushqimet.
Ministri i Jashtëm në detyrë i talebanëve, Amir Khan Muttaqi, u bëri thirrje shteteve të huaja që të ndihmojnë Afganistanin për ta përballuar këtë krizë.
“Ne besojmë se Shtetet e Bashkuara si një vend i madh duhet të kenë një zemër të madhe. Afganistani është një vend i varfër dhe nuk duhet të trajtohet mizorisht. Ne duam marrëdhënie pozitive dhe gjithëpërfshirëse me bashkësinë ndërkombëtare, dhe u kërkojmë atyre gjithashtu që të mos shtojnë presionin mbi popullin afgan”, tha Ministri i Jashtëm në detyrë, Amir Khan Muttaqi.
Edhe pse pjesa më e madhe e vendeve e ka kundërshtuar qeverinë e talebanëve, janë dy shtete të cilat po i ndihmojnë ata. Bëhet fjalë për Kinën dhe Pakistanin, të cilat kanë dërguar furnizime ushqimore dhe shëndetësore qeverisë në fuqi të talebanëve dhe kanë zhvilluar takime me përfaqësuesit talebanë.
