Dashnor Sula, ish-deputet i PD-së, i cili është emëruar Kryeinspektor i Përgjithshëm është etiketuar si ‘gjel deti’, apo ‘bedel’ nga kryeministri Edi Rama për të cilin sot punon.
Një detyrë të cilën Sula e mohoi pak javë më parë, duke thënë se nuk e kishte idenë se pse po raportohej, por që sot doli gënjeshtar.
“Në radhë të parë sa më ka blerë? Sa miliona euro?” pyeste Dash Sula në media duke e mohuar kategorikisht lajmin se ai do të ishte Kryeinspektor i Përgjithshëm pas dorëheqjes së Shkëlqim Hajdarit.
“Kam zero telefonatë, takim, ofertë për këtë rast që po flisni. Po të kisha një emërim. Kam 20 vjet në politik dhe jam faqebardhë. Jam me zero akuza. Nuk është e vërtetë. Nuk jam njeri që gënjej dhe mashtroj”, mohonte në një prononcim për një televizion më 16 janar.
Por, pas emërimit ai ‘kapërdiu’ akuzat për hajdutëri drejt qeverisjes së Ramës kur i trumbetonte në parlament, për 4 mandate nën singël e PD-së. Kapërdiu dhe ofendimet dhe sulmet e Ramës‚ kur e etikentonte “gjel deti Peqini për shkak të traditës së banorëve të Peqinit, nga vjen dhe Dash Sula për të rritur gjela deti.
“Pusho, o ‘gjel deti’, pusho! Pusho me atë fjalor, sepse nuk je në festën e gjelave të detit të Peqinit! Pusho, o bedel! Pusho! Me cilën gjuhë?! Po ju që në mëngjes çoheni këtu duke ngritur dhe ulur gjithë dynjanë si hajdutë. Si nuk ju vjen turp?! Ngrini dhe ulni dynjanë si hajdutë, ju bedelë! Pusho o ‘gjel deti’, pusho! O ‘gjel deti’, pusho, se nuk je këtu në vendin tënd, je gabim këtu, je aksident! Mjerë Shqipëria për ty dhe për ata si ti!”, i drejtohej Rama nga foltorja e Kuvendit Dash Sulës në seancën parlamentare të 9 nëntorit 2022.
Për pozicionin në fjalë ishte bërë shpallja e vendit vakant, ndërkohë që pas aplikimit të Sulës, ai pas konkurrimit, ka rezultuar kandidati i parë mes rivalëve të tjerë falë ‘bujarisë’ së Ramës.
