Zbardhet dëshmia e 26-vjeçares Adjola Lakra, e cila është bashkëpunëtore në vrasjen e biznesmenit Hekuran Billa.
Në dëshminë e saj ajo ka thënë se takohej me Billën prej një viti, kurse pritën e ka bërë për para. “Me Sebastiano Malin ka miqësi. Ai më kërkoi të njihesha me Hekuran Billën dhe të krijoja miqësi me të. Për këtë më ofroi para. Kam rreth 1 vit që shoqërohesha me Billën”, ka thënë ajo në dëshminë e saj.
Adjola prej 1 viti ishte e dashura e Hekuran Billës, por siç deklaron ajo, ka bërë ujdi me Viktor Markun dhe Sebastiano Malin që të nxjerrë në pritë të dashurin e saj.
Marku dhe Sebastiano e kanë ndjekur prej shumë kohësh Billën, ndërsa kanë mësuar se ai shoqërohej me Adiola Lakrën, të cilën kanë filluar ta ndjekin më vonë.
Ata më pas kanë rënë edhe në kontakt të drejtpërdrejtë me 26 vjeçaren, të cilën e kanë paguar të bashkëpunojë dhe të telefonojë të dashurin për ta nxjerrë në pritë natën e vrasjes te Komuna e Parisit.
