Ditët e fundit, para arrestimit të Erion Veliajt, drejtorët e bashkisë Tiranë kanë firmosur tendera pa garë me shpejtësi dhe pakujdesi në shkeljen e ligjit. Më i zellshmi për të ndjekur axhendën të kryetarit ka qenë Kostandin Budurushi, drejtor i Ujësjellës Kanalizimeve.
Në këtë kuadër, Budurushi ka bërë një tender për këmisha, funde dhe kravata për punonjëset e ujësjellësit.
Bëhet fjalë për prokurimin me objekt “Blerje veshje të ndryshme pune për UKT sh.a”. Me këtë tender bëhen “rrush e kumbulla” 6 955 380,00 lekë.
Tenderi është vlerësuar me “Flamurin e kuq” nga Open Data Albania, që e përdor këtë shenjë për të treguar riskun e korrupsionit. “Skualifikim i të gjithë operatorëve konkurrues përveç fituesit/ Skualifikim i ofertës me vlerë më të ulët”, është përshkrimi i bërë për procedurën.
Ky është një nga ato tenderat tipikë që bëhen në fund të vitit për të mos u vënë re nga publiku. Më 30 dhjetor 2024 është bërë njoftimi në Agjencinë e Prokurimeve Publike, ndërsa data e dorëzimit të dokumenteve është lënë për në 10 janar 2025. Drejtor Budurushi duke kryer porosinë e Veliajt ia ka dhënë tenderin klientes së përhershme të bashkisë, Vojsava Zenelajt. Megjithëse në tender kishte aplikuar me një ofertë më të ulët një kompani serioze, Budurushi e ka skualifikuar.
Kështu kompania “MUHOPLUS LTD” sh.p.k ka propozuar ta kryejë porosinë 5.811.160 lekë, por është zgjedhur e përhershmja Zenelaj që ka ofertën më të shtrenjtë, 6.870.700 lekë.
Në fakt, Budurushit nuk i dhimbsen paratë e mbledhura nga tarifat e qytetarëve të kryeqytetit. Rëndësi ka që paratë t’i shkojnë mikes së kryetarit.
Tenderi duket qartë se bëhet për qëllime përfitimi. Nëse shohim listën e veshjeve do të shohim se gjysma e tyre janë të përmasave XXL, XXXL që duhet të jenë mbetje nëpër magazina.
Ndërkaq, pasi mashtroi qytetarët kur rriti çmimin e ujit, Veliaj nuk e ka mbajtur premtimin për furnizim 24 orë. Po ashtu uji, sipas analizave zyrtare, rezulton i pakonsumueshëm. Dhe pa u shqetësuar për situatën, drejtor Budurushi blen këmisha, funde e kravata me paratë e qytetarëve.
Edhe paraardhësit: Redi Molla, që është sot në burg, edhe Elton Kacidhja që i doli emri në SPAK për shoqërinë “5D”, kështu vepronin. Ndërsa Vojsava Zenelaj është emër i njohur për bashkinë Tiranë. Për shembull në vitin 2020, ish-drejtori i asaj kohe i Ujësjellësit të Tiranës i skualifikoi të gjithë pjesëmarrësit në tenderin për veshjet, përveç Vojsavës. Në dokumentin e mëposhtëm tregohet se në vitin 2020 Vojsava mori me “Flamur të kuq” 90 milionë lekë.
Pa e zgjatur shumë, më 7 shkurt 2025, Budurushi i ka lidhur kontratën Vojsavës dhe e ka publikuar fituesin në Agjencinë e Prokurimeve Publike.
Situata në UKT ka marrë një kthesë të re pas publikimit të emrit të ish-drejtorit të përgjithshëm, Elton Kacidhja, në komunikimet e WhatsApp-it të kompanisë “5D”, drejtuesit e së cilës janë nën hetim nga SPAK. Për të shmangur përfshirjen publike të Bashkisë në këtë skandal, më 25 tetor 2024, Veliaj bëri një rokadë të drejtuesve. Në krye të UKT u vendos Elda Muçi, e cila, pa kaluar as një muaj, u zëvendësua nga një tjetër emër i besuar i kryetarit, Kostandin Budurushi.
Kujtojmë se sot në bashkinë e Tiranës shkoi një grup i hetuesve të BKH që arrestuan kryetarin Erion Veliaj, i cili akuzohet për korrupsion, shpërdorim të detyrës, pastrim të parave, fshehje të të ardhurave.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
