Pas lënies në burg të komisarit Arjan Tase nga Gjykata e Vlorës me akuzën e “vrasjes me dashje”, të afërmit dhe dëshmitarët e tragjedisë së Himarës, kanë kërkuar t’i shkojnë deri në fund çështjes për Jonadën e vogël. Mësohet se ata duke mos u pajtuar se çfarë ka dokumentuar Prokuroria do të hartojnë një dosje të re për ngjarjen e Potamit të cilët do ta depozitojnë në ambasadën britanike.
Të afërmit dhe dëshmitarët kanë reaguar në rrjetet sociale duke treguar se kanë të dhëna dhe prova, të cilat nuk janë marrë në vendin e ngjarjes që do t’i depozitojnë në ambasadën britanike, duke u bazuar edhe në faktin se e ndjera Jonada ishte me nënshtetësi britanike.
Përgjatë ditëve të fundit, Prokuroria e Vlorës që ka në dorë hetimin e çështjes ka bërë me dije se ka nisur edhe hetimin e praktikave të koordinimit të institucioneve lokale dhe qendrore për të parë se çfarë nuk ka shkuar mirë me rastin konkret mes tyre.
Ndonëse aty nuk bëhet fjalë për një problem procedural apo shkresor, po për marrjen e jetës së një fëmijë të pafajshëm nga një efektiv policie, mësohet se tashmë hetimi është përqendruar vetëm në këtë pikë.
Të dhënat tregojnë se do të jenë edhe avokatët e familjes së viktimës, të cilët do të jenë në betejë për zbardhjen e plotë të ngjarjes së rëndë, për të mos lejuar që të manipulohen fakte e prova.
Nuk dihet ende nëse Prokuroria ka mundur të sekuestrojë pamjet filmike të hotelit që ka qenë përballë vendit të tragjedisë, e po ashtu nuk është bërë pjesë e dosjes ende gjendja teknike e mjetit lundrues, për të cilin vetë i zoti i tij, Arjan Tase, tha që ka pasur probleme.
Prokuroria këmbëngul që mjeti nuk ka pasur defekte, ç’ka lë të kuptohet që Tase ka dashur të fshehë pas defektit të mjetit atë manovër që shkak toi edhe tragjedinë e madhe.
